दिक्तेलमा फेरि तीन जना कोरोना संक्रमित थपिए

सविना अछामे–
खोटाङ, कात्तिक १६–दिक्तेलमा फेरि तीन जना कोरोना संक्रमित थपिएका छन् । राष्ट्रिय जनस्वास्थ्य प्रयोगशाला टेकुले कात्तिक १६ गते तीन जनामा कोरोना संक्रमण पुष्टि गरेको हो ।
जिल्ला अस्पताल खोटाङ श्रोतका अनुसार दिक्तेल रुपाकोट मझुवागढी नगरपालिका–१ का १९ वर्षीय पुरुष, जिल्ला प्रशासन खोटाङका ४१ वर्षीय कर्मचारी र सशस्त्र प्रहरी बल हलेसी गुल्ममा कार्यरत ४२ वर्षीय पुरुषमा कोरोना संक्रमण पुष्टि भएको हो । प्रशासनमा उनी सहित पा“च जना कोरोना पुष्टि भएको छ । गत कात्तिक १२ गते पीसीआर परीक्षणका लागि ६७ जनाको स्वाब पठाइएकोमा ६६ जनामध्ये १५ जनामा कोरोना पुष्टि भएको हो । अर्को एक जनाको आउन बा“की रहेको जिल्ला अस्पताल खोटाङले जनाएको छ ।
गत १४ गते १२ जनालाई कोरोना संक्रमण पुष्टि भएको थियो । त्यत्तिखेर जिल्ला समन्वय समिति खोटाङका जिल्ला समन्वय अधिकारी राजेश गिरी, जिल्ला समन्वय समितिका प्रमुख बबि चाम्लिङका स्वकीय सचिव मिलनचन्द्र राई, समन्वय प्रमुख बबि चाम्लिङकी श्रीमती सर्मिला राई, पत्रकार दिवश रिजाल लगायत १२ जनालाई कोरोना संक्रमण भएको जिल्ला समन्वय समितिका प्रमुख चाम्लिङले सुनाए । त्यस्तै दिक्तेल रुपाकोट मझुवागढी नगरपालिका–१ का ५२, ३२, ४५, ३३, ३२, ३५, ४२ र ५७ वर्षका पुरुषमा कोरोना संक्रमण पुष्टि भएको जिल्ला अस्पतालका चिकित्सक प्रवीण झाले बताए ।
कात्तिक ९ गते जिल्ला समन्वय समितिका प्रमुख बबि चाम्लिङ, प्रमुख जिल्ला अधिकारी शालिग्राम शर्मा पौडेल, सहायक प्रमुख जिल्ला अधिकारी विकल श्रेष्ठ र प्रहरी नायव उपरीक्षक नारायणप्रसाद चिमरीयालाई कोरोना पुष्टि भएको थियो ।
यसबाहेक दिक्तेलबजारका अन्य तीन जना सर्वसाधारणलाई समेत कोरोना पुष्टि भएपछि कात्तिक १३ गतेदेखि दिक्तेलबजार सिल गरिएको थियो । दिक्तेलका व्यवसायीहरुमा समेत कोरोना देखिएपछि बजारबासीको आग्रहमा दिक्तेल रुपाकोट मझुवागढी नगरपालिकाले बजार सिल गरेको प्रमुख जिल्ला अधिकारी शालिग्राम शर्मा पौडेलले सुनाए । दिक्तेल रुपाकोट मझुवागढी नगरपालिका प्रमुख दीपनारायण रिजालका अनुसार दिक्तेल बजारका तीन जनामा कोरोना संक्रमण देखिएपछि बजारीबासीको अनुरोधमा अनिश्चितकालीन सिल गरिएको हो ।
कोरोना संक्रमण बढेपछि जिल्ला प्रशासन कार्यालय, मालपोत, नापी, कृषि, सिंचाई, वन, खानेपानी, जिल्ला समन्वय समिति, दिक्तेल रुपाकोट मmझुवागढी नगरपालिका लगायतका नगरक्षेत्रभित्र पर्ने सरकारी अड्डाहरु तथा गैरसरकारी निकायहरु बन्द भएका हुन् । यसबाहेक सबै बैंकहरु समेत बन्द गरिएका छन् । औषधी पसल, दैनिक उपभोग्य वस्तु लगायतका पसल बाहेक अन्य सबै बन्द गरिएको छ । अत्यावश्यक बाहेक यातायात समेत बन्द गरिएको छ । अर्को व्यवस्था नभइन्जेलसम्मलाई बन्द गरिएको नगरप्रमुख रिजालले बताए ।