भोटेकोशी बाढीमा परेका खोटाङका अशिम राई नुवाकोट सेनाको ब्यारेकमा भएको पुष्टि

नमस्ते खोटाङ संवाददाता–
खोटाङ, भदौ १३–भोटकोशी बाढीमा परी घाइते अवस्थामा उद्धार गरिएका खोटाङका ३२ अशिम राई नुवाकोटस्थित नेपाली सेनाको ब्यारेकमा रहेको खुलेको छ । अहिलेसम्म उनका परिवार तथा आफन्त कसै पनि सम्पर्कमा नआएकाले त्यसका लागि जिल्ला प्रहरी कार्यालय खोटाङले अनुरोध गरेको छ ।
जिल्ला प्रहरी कार्यालय खोटाङका सूचना अधिकारी निराजन बस्नेतका अनुसार घाइते अवस्थामा उद्धार गरी उपचार भइरहेको तर उनको स्पष्ट ठेगाना नखुलेकाले परिवार तथा आफन्तलाई सम्पर्क गर्न अनुरोध गरिएको हो । उक्त बाढीमा परी सम्पर्क विहीन भएका अन्य ७ जना भने अझै सम्पर्कमा आएका छैनन् । ऐसेलुखर्क गाउँपालिका–७ माक्पाका ६० वर्षीय तारानाथ थापा भने सम्पर्कमा आएका छन् ।