दिखुवा खोलामा पुल निर्माणको ठेक्का लिने निर्माण कम्पनीको बैंक ग्यारेन्टी जफत गर्न पत्राचार

नमस्ते खोटाङ संवाददाता–
खोटाङ, जेठ २१–दिखुवा खोलामा पुल निर्माणको ठेक्का लिने निर्माण कम्पनीको बैंक ग्यारेन्टी जफत गर्न पत्राचार गरिएको छ । कामै नसकी म्याद गुजार्ने अन्शुवी–नेपाल फूलबारी–पिंगला ज्वइन्ट भेन्चर सुनसरीको बैंक ग्यारेन्टी तान्नका लागि कृषि विकास बैंक काठमाडौंलाई जेठ २० गते पत्राचार गरिएको हो ।
दिक्तेल रूपाकोट मझुवागढी नगरपालिका–४ खाल्ले र दिक्तेल रूपाकोट मझुवागढी नगरपालिका–१५ बिजयखर्कको बीचमा पर्ने दिखुवा खोलाको पुल निर्माणका लागि उक्त निर्माण कम्पनीले संझौता गरेको थियो । दुई करोड ७० लाख २६ हजारको लागतमा २०८३ बैशाख २४ गतेभित्र सक्ने गरी २०८२ पुस २३ गते संझौता गरेको थियो । संझौता लगत्तै कुल बजेटको २० प्रतिशत पेश्की समेत लिएको थियो । तर पेश्की लिएर कामै नगरी सम्पर्क विहीन भएपछि निर्माण कम्पनीलाई पटक–पटक पत्राचार गर्दा समेत अटेर गरेको पूर्वाधार विकास कार्यालय खोटाङका प्रमुख विनम दाहालले बताएका छन् ।
दाहालका अनुसार उक्त निर्माण कम्पनीलाई पटक–पटक ३ पटक पत्राचार गर्दा समेत कुनै जवाफ नदिएपछि २०८३ बैशाख ७ गते बैंक ग्यारेन्टी जफत गर्नका लागि सम्वन्धित कम्पनीको बैंक ग्यारेन्टी भएको कृषि विकास बैंक काठमाडौंलाई पत्राचार गरिएको थियो । बैंकलाई पत्राचार गरेपछि भने बैंकले ताकेता गरेपछि सम्बन्धित निर्माण कम्पनी सम्पर्कमा आएको थियो । निर्माणमा संलग्न वसन्त बुढाथोकी गत जेठ ४ गते कार्यालयमा उपस्थित भएर असार २० गतेभित्र काम सक्ने भनी प्रतिबद्धता र निर्माण कार्यतालिका पेश गरेपछि त्यतिन्जेलका लागि म्याद थप गरिएको दाहालले सुनाए । त्यसपछि फेरि कामै नगरी निर्माण कम्पनी सम्बद्ध सम्पर्क विहीन भएपछि जेठ २० गते ३ दिनभित्र बैंक ग्यारेन्टी तान्न कृषि विकास बैंक काठमाडौंलाई पत्राचार गरिएको दाहालले बताएका छन् । बैंक ग्यारेन्टी तानेपछि ठेक्का तोडेर कालो सूचीका लागि प्रक्रिया बढाइने समेत दाहालले सुनाएका छन् ।
कोशी प्रदेश भौतिक पूर्वाधार विकास मन्त्रालय अन्तरगत पूर्वाधार विकास कार्यालय गाइघाट र प्रदेश सडक पुल सहयोग इकाइ इटहरीको साझेदारीमा दिखुवा खोलामा ट्रस ब्रिज निर्माणको काम सुरु गरिएको थियो । अहिलेसम्म उक्त पुलको भौतिक प्रगति १ प्रतिशत पनि नभएको पूर्वाधार विकास कार्यालय खोटाङले जनाएको छ । उक्त पुलको पिलरको जग मात्र खनेर रड मात्र बिच्छ्याएको दाहालले बताएका छन् । निर्माण सामग्री भने निर्माण स्थलमा ल्याइएको छ । उक्त समाग्री प्रयोग नगरिएकाले खिया लाग्न थालेको छ ।