प्रधानमन्त्री साहको सीमासम्वन्धी अभिव्यक्तिको विरुद्ध प्रमुख जिल्ला अधिकारीलाई ज्ञापनपत्र

नमस्ते खोटाङ संवाददाता–
खोटाङ, जेठ १८–प्रधानमन्त्री बालेन्द्र साहले जेठ १७ गते संसदमा दिएको सीमासम्वन्धी अभिव्यक्तिको विरुद्ध खोटाङस्थित विभिन्न विद्यार्थी संगठनहरूले जिल्ला प्रशासन कार्यालय खोटाङमा ज्ञापनपत्र बुझाएका छन् । प्रधानमन्त्री साहले दिएको अभिव्यक्ति तत्काल फिर्ता लिन र नेपाली जनतासमक्ष सार्वजनिक रूपमा माफी माग्नु पर्ने माग राख्दै ने.वि.संघ, अनेरास्ववियु, अखिल (क्रान्तिकारी) र अनेरास्ववियूले प्रमुख जिल्ला अधिकारी रेखा कँडेललाई जेठ १८ गते ज्ञापनपत्र बुझाएका हुन् ।
उक्त ज्ञापनपत्रमा लिम्पियाधुरा, लिपुलेक र कालापानी लगायत नेपाली भूमिमा भारतीय अतिक्रमण जारी रहेको जनाउदै प्रधानमन्त्रीबाट आएको अभिव्यक्तिले राष्ट्रिय स्वाधीनता, सार्वभौमिकता र भौगोलिक अखण्डतामाथि चोट पुगेको समेत उल्लेख गरिएको छ । प्रधानमन्त्री साहले नेपालको सीमासम्वन्धी संसदमा बोलेको अभिव्यक्ति तत्काल फिर्ता लिन, नेपाली जनतासमक्ष सार्वजनिक रूपमा माफी माग्न र आफ्नो धारणा सच्याउन माग गरेका छन् । अन्यथा राष्ट्रहित र राष्ट्रिय स्वाधीनताको पक्षमा विद्यार्थी, युवा तथा आम जनताले सशक्त प्रतिरोध गर्ने चेतावनी समेत ज्ञापनपत्रमा उल्लेख गरिएको छ ।
ज्ञापनपत्रमा ने.वि.संघ खोटाडका अध्यक्ष मोतीचन्द्र राई, अनेरास्ववियु खोटाङकी अध्यक्ष सुशिला तिमिल्सेना, अखिल (क्रान्तिकारी) खोटाडका अध्यक्ष डर्विन चाम्लिङ राई र अनेरास्ववियू खोटाडका सचिव रेश्जन राईले हस्ताक्षर गरेका छन् ।