यलम्बरको सालिकको उद्घाटन कोशी प्रदेशका पर्यटन वन तथा वातावरण मन्त्री र यायोक्खा केन्द्रीय अध्यक्षले गर्ने (भिडिओ सहित)

नमस्ते खोटाङ संवाददाता–
खोटाङ, बैशाख १२–दिक्तेल रूपाकोट मझुवागढी नगरपालिका–१४ बुइपामा निर्माण गरिएको ११० फिट अग्लो यलम्बरको सालिकको उद्घाटन कोशी प्रदेश पर्यटन वन तथा वातावरण मन्त्री भीम पराजुली र किरात राई यायोक्खा केन्द्रीय अध्यक्ष जीवन हाताछोले गर्ने भएका छन् । दिक्तेल रूपाकोट मझुवागढी नगरपालिकाको आयोजनामा आगामी बैशाख १७ गते उक्त सालिकको उद्घाटन हुने भएको हो ।
दिक्तेल रूपाकोट मझुवागढी नगरपालिका–१४ बुइपाका वडाअध्यक्ष दिनेश राईले श्रम संस्कृति पार्टीका अध्यक्ष हर्क साम्पाङबाट उद्घाटन गर्ने बैशाख ९ गते पत्रकार सम्मेलन गरी जानकारी गराए पनि नगरकार्यपालिकाको शनिबारको बैठकले पराजुली र हाताछोबाट उद्घाटन गर्ने निर्णय गरेको हो ।
बैशाख १२ गते दिउसो सर्वदलीय बैठक र त्यसपछिको कार्यपालिकाको बैठकले उक्त निर्णय गरेको नगरप्रमुख भट्टराईले बैशाख १२ गते बेलुकी पत्रकार सम्मेलन आयोजना गरी जानकारी गराएका हुन् । उक्त सालिक कोशी प्रदेश ७० र स्थानीय तहको ३० प्रतिशत गरी ११ करोड ४९ लाख २३ हजार १ सय ५४ रूपैयाँको बजेटमा निर्माण भएको हो । उमा तुवाचुङ अन्सुली जेभीले ११ करोड ५८ लाख १६ हजार चार सय ४१ रूपैयाँको बजेटमा १८ महिनाभित्र सक्ने गरी २०७८ असार २८ गते संझौता गरेको थियो । तर डिजाइनका कारण बेलामा काम नसकिदा पटक–पटक म्याद थपिदै आएको थियो । गत वर्ष काम सम्पन्नपछि भुक्तानी समेत भइसकेको दिक्तेल रूपाकोट मझुवागढी नगरपालिकाका सूचना अधिकारी मोहनकुमार भट्टराईले बताएका छन् ।
निर्माण सम्पन्नपछि कोशी प्रदेशका मुख्य मन्त्री हिकमतकुमार कार्कीबाट गत जेठ १८ गते उद्घाटन गर्ने योजना बनाइए पनि पहिचानपक्षधरहरूले अबरोध गरेका थिए । कोशी प्रदेश नामाङ्कनको पक्षमा हस्ताक्षर गर्ने कोशी प्रदेशका ८२ सांसदहरू र पहिचान पक्षधरहरूको विरुद्धमा उभिने तत्कालीन प्रधानमन्त्री केपी शर्मा ओली, महेश बस्नेत र योगेश भट्टराई गरी ८५ जनाको हातबाट उद्घाटन गर्न नहुने भन्दै किरात राई यायोक्खाले दिक्तेल रूपाकोट मझुवागढी नगरपालिकालाई पत्राचार गरिएको थियो । त्यसपछि उद्घाटन रोकिएको थियो ।