शिक्षा, विज्ञान तथा प्रविधि मन्त्री पुनले खोटाङमा निर्मित बाँसका सामान प्रयोग गर्ने

नमस्ते खोटाङ संवाददाता–
खोटाङ, मङ्सिर १२–शिक्षा, विज्ञान तथा प्रविधि मन्त्री महावीर पुनले दिक्तेल रूपाकोट मझुवागढी नगरपालिकामा बनाइएका बाँसका फर्निचर प्रयोग गर्ने भएका छन् । मन्त्री पुन र दिक्तेल रूपाकोट मझुवागढी नगरपालिकाका प्रमुख तीर्थराज भट्टराई बीच मङ्सिर ११ गते भएको भेटघाटमा पुनले उक्त बचन दिएका हुन् ।
भट्टराईका अनुसार भेटघाटको क्रममा मन्त्री पुनले आफ्नो कार्यकक्षमा आवश्यक पर्ने फर्निचर बाँसबाट बनाइएको उपयोग गर्ने बताएका हुन् । पुनले कुर्सी, टेबल, ¥याक, डस्बिन, फूलदानी लगायत कार्यकक्षमा पूरै बाँसबाटै निर्मित सामग्री राख्नका लागि अर्डर समेत गरेको भट्टराईले बताएका छन् ।
त्यस्तै वाणिज्य सचिव कृष्णबहानुर राउतले समेत पनि आफ्नो कार्यकक्षमा पूरै बाँसबाटै निर्मित सामग्री उपयोग गर्ने भट्टराईले बताएका छन् । दुवै मन्त्रालयमा दिक्तेल रूपाकोट मझुवागढी नगरपालिका–६ नेर्पास्थित ब्याम्बो ग्राफ्ट प्रशोधन कृषक समूहले निर्माण गरेको सामग्री प्रयोग गर्ने भट्टराईले जनाएका छन् । उक्त कृषक समूहलाई नगरपालिकाले बाँसका सामग्री बनाउने तालिम उपलब्ध गराएको थियो । आफ्नो नगरमा उत्पादित बाँसका सामग्री सिंहदरबारसम्म पुग्ने भएपछि खुसी लागेको भट्टराईको भनाइ छ ।