भरुवा बन्दुक देखाएर रकम मागेको प्रकरणमा मुछिएका श्यामकुमार राईद्वारा प्रहरीमा आत्मसमर्पण

नमस्ते खोटाङ संवाददाता–
खोटाङ, भदौ २०–भरुवा बन्दुक देखाएर रकम मागेको आरोप लागेका नेपाली कांगे्रस खोटाङका सदस्य श्यामकुमार राई जिल्ला प्रहरी कार्यालय खोटाङमा आत्मसमर्पण गरेका छन् । दिक्तेल रूपाकोट मझुवागढी नगरपालिका–११ खार्मीका राईले गत भदौ १६ गते बिहान खार्मीबाट दिक्तेल आउँदै गरेको ना १ ज ४३७२ नंम्बरको सुमोलाई बाँस तथा मुढाले सडक अवरुद्घ गरी भरुवा बन्दुक देखाएर रकम असुल्न खोजेपछि प्रहरीको खोजीमा रहेका राईले भदौ २० गते आत्मसमर्पण गरेका हुन् ।
जिल्ला प्रहरी कार्यालय खोटाङका सूचना अधिकारी प्रहरी निरीक्षक राजु विष्टका अनुसार भदौ २० गते प्रहरीमा उपस्थित भएपछि पहिलो चोटीलाई सात दिनको म्याद थप गरी हिरासतमा राखेर अनुसन्धान बढाइएको छ । उनी विरुद्ध गत भदौ १८ गते डाका उद्योगसम्बन्धी शीर्षकमा मुद्दा दर्ता गरिएको विष्टले सुनाएका छन् । ‘आज प्रहरी कार्यालयमा हाजिर हुनु भयो, त्यसपछि सात दिनको म्याद थप गरी हिरासतमा राखेर अनुसन्धान सुरु गरिएको छ’–विष्टले भने ।