कोशी प्रदेश भौतिक पूर्वाधार विकास तथा स्वास्थ्य मन्त्री भूपेन्द्र राईको कार्यक्रम बिथोलियो (भिडिओ सहित)

नमस्ते खोटाङ संवाददाता–
खोटाङ, बैशाख २५–कोशी प्रदेश भौतिक पूर्वाधार विकास तथा स्वास्थ्य मन्त्री भूपेन्द्र राईको साकेला गाउँपालिका–३ खिदिमामा बैशाख २५ गते आयोजित सर्वदलीय, सर्वपक्षीय नागरिकसंग भेटघाट कार्यक्रम बिथोलिएको छ । साकेला गाउँपालिकामा विकास योजना राख्नु पर्नेमा कटौती गरेको भन्दै गाउँपालिका अध्यक्ष रविप्रकाश राई लगायत स्थानीयले केही बेर कार्यक्रम बिथोलेका हुन् ।
साकेला गाउँपालिकामा राजनीतिक पूर्वाग्राहीले विभिन्न योजनाहरू कटौती गरेको भन्दै गाउँपालिका अध्यक्ष राईको नेतृत्वमा करिब तीन घण्टा कार्यक्रम बिथोलिएको हो । विहान ११ बजेर ५० मिनेटमा कार्यक्रमस्थल पुगेका मन्त्री राई र गाउँपालिका अध्यक्ष रविप्रकाश राई बीच वार्तापछि पौने तीनबजे कार्यक्रम सुरु भएको खोटाङका प्रहरी नायव उपरीक्षक प्रतिक विष्टले बताएका छन् । मन्त्री राईका सचिवालय टिमका बाजिन्द्र विष्टका अनुसार सुरुमा कार्यक्रम बिथोलिए पनि पछिबाट चाहिँ एउटै मञ्चमा बसेर कार्यक्रम भइरहेको छ ।
मन्त्रीराईलाई कार्यक्रमस्थल प्रवेशमा समेत अबरोध गरेका थिए । तर सुरक्षाकर्मीले पन्छाएर मन्त्री राईलाई कार्यक्रमस्थलमा प्रवेश गराएको थियो । कार्यक्रमस्थलमा सशस्त्र प्रहरी नायव उपरीक्षक दीपेन्द्र थापा सहित सशस्त्र तथा जनपथ प्रहरी तैनाथ छन् ।