आगामी जेठ दोश्रो साता छैटौ केएफए सुचन स्मृति दिक्तेल मेयर कप फुटबल प्रतियोगिता हुने

सविना अछामे–
खोटाङ, बैशाख २१–आगामी जेठ दोश्रो साता छैटौ केएफए सुचन स्मृति दिक्तेल मेयर कप फुटबल प्रतियोगिता हुने भएको छ । खोटाङ फुटबल एकेडेमीको आयोजनामा आगामी जेठ ७ गतेदेखि १० गतेसम्म दिक्तेल रङ्गशालामा उक्त फुटबल खेल हुने भएको हो ।
दिक्तेल रूपाकोट मझुवागढी नगरपालिकाको मुख्य प्रायोजनमा हुने इलेभेन ए साइडको फुटबल खेलमा जिल्लाका सात र एक अतिथि गरी आठ टिमको सहभागिता रहने आयोजकले जनाएको छ । प्रतियोगिताको विजेता टिमले दुई लाख नगद, ट्रफी, मेडल र प्रमाणपत्र पाउने छ । उपविजेता टिमले एक लाख नगद सहित ट्रफी, मेडल र प्रमाणपत्र पाउने खेल संयोजक रोशिस श्रेष्ठले जनाएका छन् । खेलमा विधागत पुरस्कारको पनि व्यवस्था गरिएको श्रेष्ठले बताएका छन् । उनका अनुसार उत्कृष्ट खेलाडीले सात हजार नगद, ट्रफी, मेडल र प्रमाणपत्र तथा उत्कृष्ट गोल किपर, उष्कृष्ट प्रशिक्षक र उच्च गोलकर्ताले जनही चार हजार नगद, ट्रफी, मेडल र प्रमाणपत्र पाउने छन् । त्यस्तै उदीयमान खेलाडीलाई दुई हजार र मेनअफदी म्याच वापत एक हजार नगद सहित ट्रफी, मेडल र प्रमाणपत्र प्रदान गरिने आयोजकले जनाएको छ ।
खेलमा ११ मध्ये तीन जना जिल्ला तथा देश बाहिरका खेलाडी समावेश गर्न पाइने आयोजकले जनाएको छ । छैटौ संस्करणमा खोटाङ फुटबल एकेडेमी, हलेसी तुवाचुङ फुटबल क्लव, सोल्मा स्पोर्टस् क्लव, बाक्सिला फुटबल क्लव, नुनथला स्पोर्टस् क्लव, नेर्पा स्पोर्टस् क्लव, माटिकोरे सामाजिक सेवा क्लव र नेपाल आर्मी रणभीम गण सहभागी हुने आयोजकले जनाएको छ । केएफएले वर्षैपिच्छे फुटबल प्रतियोगिता गर्दै आएको छ । यसअन्तरगत पहिलो सस्करणमा केएफए, दोश्रोमा युवा जागरण, तेश्रोमा योङ बोइज युनाइटेड, चौथोमा नेर्पा स्पोर्टस् क्लव र पाँचौ संस्करणमा केएफएले उपाधि चुमेको थियो ।