साप्सुखोला जलविद्युत आयोजनाले खोलामा पानी नछाडेको स्थानीयले गुनासो (भिडिओ सहित)

सविना अछामे–
खोटाङ, बैशाख ९–हलेसी तुवाचुङ नगरपालिका–११ राजापानीस्थित साप्सुखोलाबाट ६.६ मेगावाट क्षमताको जलविद्युत आयोजनाले खोलामा पानी नछाडेको स्थानीयले गुनासो गरेका छन् । मुहानदेखि पावर हाउससम्म खोला नै सुकाएर पानी फर्काउने गरेकाले जलचर तथा खेतीयोग्य जमिनमा असर परेको स्थानीयले गुनासो गरेका हुन् ।
खोलामा कम्तिमा १० प्रतिशत पानी छाड्नु पर्नेमा खोलै सुकाएर जलविद्युतले पानी फर्काएपछि खोलाका जलचर सखाप हुनका साथै खेतीयोग्य जमिनमा समेत असर परेको हलेसी तुवाचुङ नगरपालिका–११ राजापानीका कुमार बुढाथोकीले बताएका छन् । उक्त जलविद्युत आयोजनाको मुहान भएको ठाउँ बसुवादेखि पावर हाउस भएको ठाउँ बेलडाडाँसम्म करिब ४ किलोमिटर खोलामा पानी नहुदा जलचर तथा खेतीयोग्य जमिनमा असर परेको बुढाथोकीले सुनाएका छन् । यसबारेमा गत वर्ष नै सम्वन्धित निकायको ध्यानाकर्षण गराउदा समेत बेवास्ता गरिएको बुढाथोकीको भनाई छ ।
जलविद्युत आयोजनाका कारण सिचाइ कुलोको मुहान बिग्रिएपछि रेग्मीटार क्षेत्रको करिब ५० हेक्टर जमिनमा गरिने खेती प्रभावित भएको स्थानीय पुण्यप्रसाद रेग्मीले बताएका छन् । रेग्मीटार क्षेत्रमा ५६ घर परिवारको घर तथा खेतीयोग्य जमिन छ । पानी अभावले बसाइँ सर्नु पर्ने अवस्थामा पुगेको रेग्मीले सुनाएका छन् । गत वर्ष पनि पानी नछाड्नुका साथै जलविद्युत निर्माण गर्दा बिग्रिएको कुलो नबनाएकाले दिक्तेलस्थित प्रहरी कार्यालयमा छलफल गर्नु परेको स्थानीय कमलराज रेग्मीले बताएका छन् ।
उक्त आयोजनाको प्रबद्र्धक कम्पनी थ्री–स्टार हाइड्रोपावर कम्पनी सम्वद्ध जेनिस लामाले भने १० प्रतिशत पानी खोलैमा छाडिएको दाबी गरेका छन् । करिब एक अर्ब ५० करोडको लागनीमा सम्पन्न उक्त जलविद्युत आयोजनाको विद्युत २०७८ पुसमा राष्ट्रिय प्रशारण लाइनमा जोडिएको छ ।