३५ दिनभित्र सिसाजन्य वस्तु व्यवस्थापन नगरे नगरक्षेत्रमा सिसाजन्य बोतल आयातमा प्रतिबन्ध लगाइने (भिडिओ सहित)

सविना अछामे–
खोटाङ, मङ्सिर १७–दिक्तेल रूपाकोट मझुवागढी नगरपालिकाले ३५ दिनभित्र सिसाजन्य वस्तु व्यवस्थापन नगरे सिसाजन्य बोतल आयातमा प्रतिबन्ध लगाउने जनाएको छ । नगरपालिका क्षेत्रको पर्यावरणलाई स्वच्छ र सफा राख्न, पेय पदार्थ आयत गर्ने व्यक्ति, पसल, कम्पनी वा डिलरलाई ३५ दिनभित्र व्यवस्थापन नगरे सिसाजन्य बोतल आयातमा पूर्ण रूपमा प्रतिबन्ध लगाउने जनाउ दिएको हो ।
मङ्सिर १३ गतेको नगरकार्यपालिका बैठकले नगरको स्वीकृत नीति तथा कार्यक्रम, फोहरमैला व्यवस्थापन ऐन २०६८ र फोहरमैला व्यवस्थापन नियमावली २०७० लाई कडाइका साथ कार्यान्वयन गर्ने निर्णय गरेकाले त्यसअनुसार अनुरोध गरिएको नगरप्रमुख तीर्थराज भट्टराईले बताए । फोहरमैला व्यवस्थापन ऐन २०६८ र फोहरमैला व्यवस्थापन नियमावली २०७० मा फोहरमैला उत्पादन गर्ने व्यक्ति, संस्था वा निकायले नै फोहरमैला व्यवस्थापन गर्नु पर्ने उल्लेख छ ।
यसबारे पटक–पटक छलफल र पत्राचार समेत गरिसकेकाले मङ्सिर १४ गतेदेखि लागू हुने गरी ३५ दिनभित्र व्यवस्थापन नगरिए शिशाजन्य बोतललाई नगरपालिकामा पूर्णरूपले प्रतिबन्द्ध गरिने समेत भट्टराईले बताए ।