अमेरिका गएका वडाअध्यक्ष नफर्किएपछि लगाइएको ताला तीन दिनपछि खुल्यो

नमस्ते खोटाङ संवाददाता–
खोटाङ, कात्तिक ९–साकेला गाउँपालिका–४ मात्तिमका वडाअध्यक्ष अर्जुनकुमार कटवाल अमेरिका गएर नफर्किएपछि वडा कार्यालयमा लगाइएको ताला खुलाइएको छ । वडाअध्यक्षको पद रित्त गर्ने प्रक्रिया बढाउने सहमतीपछि कात्तिक ९ गते ताला खुलाइएको हो ।
वडाअध्यक्ष कटवाल २०८० माघ १७ गते अमेरिका गएपछि नफर्किएको र उक्त पद रित्त गर्नु पर्ने माग राख्दै कात्तिक ७ गते ताला लगाइएको आन्दोलनरत पक्षका पूर्व वडाअध्यक्ष कृष्णप्रसाद भट्टराईले बताए । कात्तिक ८ गते भएको गाउँपालिका उपाध्यक्ष विर्सिका राई, निमित्त प्रमुख प्रशासकीय अधिकृत सर्मिला राई र आन्दोलनरत पक्षबीच बिहीबार तीन घण्टासम्म भएको वार्ता निष्कर्ष विहीन भएपछि गाउँपालिका अध्यक्ष रविप्रकाश राईसंग फोनमा कुराकानी गरेपछि सहमती पुगिएको भट्टराईले बताए ।