दिक्तेलमा हिंसा पीडित महिलाका लागि सुरक्षित गृह स्थापना (भिडिओ सहित)

सविना अछामे–
खोटाङ, असोज १४–दिक्तेलमा हिंसा पीडित महिलाका लागि सुरक्षित गृह स्थपना गरिएको छ । बाल सेवा समाज नेपालको २५ औ साधारणको अवसरमा असोज १३ गते उक्त सुरक्षित गृह उद्घाटन गरिएको हो ।
जिल्ला समन्वय समिति खोटाङका प्रमुख सनबहादुर राई र दिक्तेल रुपाकोटमा मझुवागढी नगरपालिकाका नगरप्रमुख तीर्थराज भट्टराईले संयुक्त रुपमा सुरक्षित गृहको उद्घाटन गरेका हुन् । सुरक्षित गृह संचालनका लागि जिल्ला अस्पताल खोटाङका प्रमुख डाक्टर रूपेश संग्रौला र बालसेवा समाज नेपालकी अध्यक्ष चन्द्रकला भुजेल बीच दुई पक्षीय सम्झौता समेत गरिएको छ ।
हिंसा पीडित महिलाका लागि सुरक्षित गृह स्थापनाका लागि बाल सेवा समाज नेपालले तीन वटा कोठा उपलब्ध गराएको छ । हिंसा पीडित महिलाको अवस्था र न्यायका लागि घरै छोडेर हिँड्नु पर्ने बाध्यतालाई ध्यानमा राखेर सुरक्षित गृहको स्थापना गरिएको जिल्ला समन्वय समिति खोटाङका प्रमुख सनबहादुर राईको भनाई छ ।
जिल्ला अस्पताल खोटाङको आर्थिक सहयोगमा बाल सेवा समाज नेपालले उक्त सुिरक्षित गृहको व्यवस्थापन गरिने भुजेलले बताएकी छन् । उक्त सुरक्षित गृह जिल्लाकै पहिलो भएको भुजेलको भनाई छ ।