साउनमा मात्रै ८९ करोड ७० लाखका विद्युतीय सवारी साधान नेपाल भित्रियो

नमस्ते खोटाङ संवाददाता–
काठमाडौं, भदौ ९–यो आर्थिक वर्ष साउन महिनामा मात्रै तीन सय ८१ वटा विद्युतीय सवारी साधन नेपाल भित्रिएको छ । भन्सार विभागका अनुसार साउनमा ८९ करोड ७० लाख २१ हजार रूपैयाँ बराबरको विद्युतीय सवारी साधन नेपाल भित्रिएको हो ।
गत आर्थिक वर्षको साउनमा एक सय १० वटा मात्रै विद्युतीय सवारी साधन आयात भएको थियो । विभागका अनुसार ३४ करोड ६ लाख रूपैयाँको सवारी साधन आयात भएको थियो । चालु आर्थिक वर्षको साउनमा सबैभन्दा बढी ५१ किलोवाटदेखि सय किलोवाटसम्मको ५८ करोड ६८ लाख रूपैयाँको सवारी साधन आयात भएको छ । विभागका अनुसार २८ करोड ९८ लाख रुपैयाँ बराबरको १६१ वटा ५० किलोवाटसम्मका क्षमताका विद्युतीय सवारी आयात भएको हो ।
२०१ किलोवाटदेखि तीन सय किलोवाट क्षमताका २ वटा सवारी साधन आयात गरिएको छ । विभागका अनुसार १०१ किलोवाटदेखि २ सय किलोवाटसम्मका र ३०० किलोवाटभन्दा बढी क्षमताका एउटा मात्रै सवारी साधन आयात भएको छ । नेपालमा भारत र चीनबाट धेरै विद्युतीय सवारी साधन भित्रने गरेको छ । यस्तै जर्मनीबाट पनि विद्युतीय सवारी साधन भित्रिएको विभागको तथ्यांक छ ।