करोडौंको लगानीमा निर्माणाधीन अवस्थामा रोकिएको यलम्बरको सालिक निर्माण सुरु (भिडियो सहित)

नमस्ते खोटाङ संवाददाता–
खोटाङ, साउन २९–करोडौंको लगानीमा निर्माणाधीन अवस्थामा रोकिएको खोटाङको दिक्तेल रूपाकोट मझुवागढी नगरपालिका–१४ बुइपाको पञ्चदोबाटास्थित एक सय फिट अग्लो यलम्बरको सालिक निर्माण सुरु भएको छ । करिब ११ करोड ५८ लाख रुपैयाँको लागतमा निर्माणाधीन अवस्थामा रोकिएको यलम्बरको सालिक निर्माण सुरु भएको हो ।
कोशी प्रदेशको ७० र स्थानीय तहको ३० प्रतिशत गरी ११ करोड ५८ लाख १६ हजार रुपैयाँको लागतमा सालिक निर्माण भइरहेको हो । २०७९ माघ मसान्तसम्म सक्ने गरी २०७९ असार २८ गते उमा–तुवाचुङ–अन्सुली जेभीले संझौता गरेको थियो ।
बेलामा काम नसकिँदा दुई पटक म्याद थप भइसकेको छ । पछिल्लो पटक २०८१ असोजसम्मका लागि म्याद थपिएको छ । नगरपालिकाले स्ट्रक्चर डिजाइन बेलामा नदिँदा ढिलाई भएको निर्माणमा सम्बद्ध सुनिल राईले बताएका छन् ।
।
आर्थिक वर्ष २०७६÷०७७ मा नगरपालिकाको बजेटबाट पार्क निर्माण सुरु भएको थियो । त्यतिखेर विनियोजित ७२ लाख रूपैयाँबाट प्रवेशद्वार, घेराबार, सुरक्षाकर्मी बस्ने ठाउँ, टिकट काट्ने ठाउँ, रेष्टुरेन्ट गृह र पसल सञ्चालन गर्ने गृह लगायतको काम उपभोक्ता मार्फत गरिएको नगरपालिकाले विवरण उपलब्ध गराएको छ ।