खोटेहाङ गाउँपालिकामा जनप्रतिनिधि, कर्मचारी, शिक्षकले छोरा–छोरीलाई निजी विद्यालयमा पढाउँन नपाउँने

नमस्ते खोटाङ संवाददाता–
खोटाङ, चैत १९–खोटेहाङ गाउँपालिकाले सरकारी कर्मचारी, शिक्षक तथा निर्वाचित जनप्रतिनिधिहरूले आफ्ना बालबच्चालाई सामुदायिक विद्यालयमा पढाउँनु पर्ने निर्णय गरेको छ । चैत १९ सूचना जारी गर्दै गाउँपालिकाबाट तलव, भत्ता लगायतका आर्थिक सुविधा प्राप्त गर्नेहरूले अनिवार्य रूपमा सामुदायिक विद्यालयमा आफ्ना बालबालिकालाई पढाउँनु पर्ने जनाएको हो ।
गत चैत ८ गतेको गाउँकार्यपालिकाको बैठकले सबै प्रकारका कर्मचारी, शिक्षक तथा सम्पूर्ण निर्वाचित जनप्रतिनिधिहरूलाई आगामी शैक्षिक सत्र २०८१ मा आफ्ना बालबालिकालाई पायक पर्ने सामुदायिक विद्यालयमा भर्ना गर्न समेत अनुरोध गरिएको छ ।
शिक्षा समितिका संयोजक तथा खोटेहाङ गाउँपालिका–६ इन्द्रेणीपोखरीका वडाअध्यक्ष वसन्त राईका अनुसार सामुदायिक विद्यालयहको गुणस्तर सुधारका लागि यो नीति अवलम्वन गरिएको हो । यसको कार्यान्वयनका लागि राजनीतिक दल, नागरिक समाज, शिक्षाप्रेमी लगायत सरोकारवालाहरूसमक्ष अपिल समेत गरिएको राईले सुनाए । यदी कसैले यसको उलङ्घन गरे सम्वन्धित व्यक्तिको तलव, भत्ता लगायतका सेवा सुविधा रोकिने समेत गाउँपालिकाले जारी गरेको सूचनामा उल्लेख छ ।