बाँसबाट आकर्षक सामग्री

खोटाङ, चैत १४–जन्तेढुङ्गा गाउँपालिकामा बाँसबाट विभिन्न सामग्री बनाउँने तालिम चैत १४ गते समापन भएको छ । गाउँपालिकाको चालु आर्थिक वर्ष एक लाख रूपैयाँको लागतमा उक्त तालिम दिइएको हो ।
स्थानीय कच्चा पदार्थको उपयोग गरी आयआर्जनको मेसो बसाउँन पुनर्ताजगी तालिम दिइएको गाउँपालिका उपाध्यक्ष खेमबहादुर खड्काले बताए । गत आर्थिक वर्ष पनि गाउँपालिकाकै तीन लाख ५० हजार रूपैयाँबाट बाँसबाट सामग्री बनाउँने आधारभूत तालिम दिइएको खड्काले सुनाए । गत वर्षको तालिमपछि बाँसबाट आकर्षक सामग्री बनाएर आयआर्जन समेत गरेकाले थप शिप विकासका लागि पुनर्ताजगी तालिम दिइएको खड्काले सुनाए ।

गत वर्ष आधारभूत तालिम लिएका ९ जनालाई नै यो वर्ष पुनर्ताजगी तालिम दिइएको खड्काले बताए । उनीहरूले बाँसबाट फर्निचर, फूलदानी, कलमदानी, कप, मक लगायतका विभिन्न आकर्षक सामग्री बनाएका छन् । उनीहरूले बनाएको बाँसका सामग्री काठमाडौं, धरान, गाइघाट लगायतका ठाउँहरूमा विक्री हुने खड्काले जनाए ।