नेपालमा टिकटक बन्द गर्ने सरकारको निर्णय

नमस्ते खोटाङ संवाददाता–
काठमाडौं, कात्तिक २७–सरकारले नेपालमा टिकटक बन्द गर्ने निर्णय गरेको छ । कात्तिक २७ गते बिहान बसेको मन्त्रिपरिषद् बैठकले नेपालमा टिकटक बन्द गर्ने निर्णय गरेको हो ।
नीतिगत रुपमा कात्तिक २७ गतेदेखि नै बन्द भए पनि प्राविधिक रूपमा भने केही दिन लाग्ने देखिन्छ । प्राविधिक रूपमा आवश्यक पर्ने व्यवस्था सञ्चार मन्त्रालयले मिलाउने जानकारी दिइएको छ । सामाजिक सञ्जाल टिकटकबाट लगातार रूपमा सामाजिक सद्भाव बिथोलिने गरेर र हाम्रो पारिवारिक संरचना, सामाजिक सम्बन्धलाई खलबल हुने गरी लगातार प्रचारप्रसार भइरहेकाले बन्द गर्नु परेको जनाइएको छ ।
पछिल्लो ४ वर्ष ३ महिनाभित्रमा १ हजार ६ सय ४८ वटा साइबर अपराधका उजुरी दर्ता भएकोमा अधिकांश टिकटकसँग सम्बन्धित भएको तथ्यांक छ । फेक एकाउन्ट खोलेर जसले जसलाई जे पनि गर्न सक्ने र बदनाम गराउने सामग्रीलाई स्वतः हटाउने कुनै संयन्त्र टिकटकमा छैन । केही देशले टिकटकलाई प्रतिबन्ध नै लगाएका छन् भने अमेरिका, फ्रान्ससहित ५० भन्दा बढी विकसित देशले यसको नियमनका लागि कदमहरू चालेका छन् ।