कोसी प्रदेशको पक्षधर सांसद तथा मन्त्रीहरुलाई जिल्ला प्रवेश नगर्न किरात राई यायोक्खाको आग्रह

नमस्ते खोटाङ संवाददाता–
खोटाङ, चैत २०– किरात राई यायोक्खा खोटाङले कोसी प्रदेशको पक्षघर प्रदेश सांसद तथा मन्त्रीहरुलाई जिल्ला प्रवेश नगर्न आग्रह गरेको छ । प्रदेश सांसद तथा मन्त्रीहरुले खोटाङमा प्रवेश गरेर औपचारिक कार्यक्रममा सहभागी नहुन चैत २० गते विज्ञप्ती मार्फत आग्रह गरेको हो ।
यायोक्खा खोटाङका अध्यक्ष युगसन किरातद्वारा जारी विज्ञप्तीमा कोसी प्रदेशको नामाङ्कनपछि प्रदेशभरि नै सांसद तथा मन्त्रीहरुलाई बहिस्कार गर्ने अभियान चलिरहेकाले जिल्ला प्रवेश गर्दा हुन सक्ने परिस्थितिको गाम्भिर्यतालाई ध्यान दिन आग्रह गरिएको छ । उक्त परिस्थितिलाई ध्यान नदिई जिल्ला प्रवेश गरे अभद्र व्यवहार भए त्यसको जिम्मेवार स्वयम्ले लिनु पर्ने उल्लेख छ । किरात राई यायोक्खाका केन्द्रीय पदाधिकारीहरु समेत कोसी प्रदेशको पक्षमा उभिने मन्त्री तथा सांसदहरुको पछि लागेको उनीहरुलाई समेत जिल्ला प्रवेशमा रोक लगाइएको किरातले बताए । चैत १८ गते भएको जिल्लास्थित पहिचान पक्षधरहरुको भेलाले उक्त निर्णय गरेको उनको भनाई छ ।