खोटाङको जिल्ला अस्प्तालमा निःशुल्क गर्भवती जाँच कार्यक्रममा अनियमितता

नमस्ते खोटाङ संवाददाता–
खोटाङ, चैत १–जिल्ला अस्पतालमा सञ्चालित निःशुल्क गर्भवती जाँच कार्यक्रममा अनियमितता भएको छ । गर्भवतीहरुको रगत, भिडियो एक्सरे लगायतका सम्पूर्ण जाँच निःशुल्क गर्नु पर्नेमा शुल्क लिएर जाँच गरिएको तर रकम भने खर्च गरिएपछि अनियमितता खुलको हो ।
गत साउनदेखि सुरु हुनु पर्ने निःशुल्क गर्भवती जाँच कार्यक्रमै नगरी आठ लाख रुपैयाँ निकासा भएको छ । अस्पताललाई प्रदेश सरकारले दश लाख उपलब्ध गराएको मध्ये उक्त रकम खर्च गरिएको हो । तत्कालीन निमित्त प्रमुख ल्याव असिष्टेण्ड विमल देवले काठमाडौंस्थित एमआरएस सप्लायर्सको नाममा खर्च गरेको पाइएको अस्पताल श्रोतले जनाएको छ । यसमा संलग्नले अनियमित तरिकाले खर्च गरिएको रकम फिर्ता गर्ने समेत प्रतिबद्धता जनाएका छन् ।
गर्भवतीहरुको रगत, भिडियो एक्सरे लगायतका सम्पूर्ण जाँच निःशुल्क गर्नु पर्नेमा फागुन २ गतेसम्म शुल्क लिएर जा“च गरिएको थियो । फागुन २ गते अस्पताल व्यवस्थापन समितिको बैठक राखेर निःशुल्क गर्भवती जाँच सुरु गरिएको अस्पतालका प्रमुख डाक्टर दिपेश परियारले बताए ।
योे लगायतका अन्य हिसाब–किताब पनि हेर्ने गरी छानविन समिति समेत गठन गरिएको छ । अस्पतालमा आर्थिक अनियमितताको गुनासो आएपछि जिल्ला अस्पताल व्यवस्थापन समिति खोटाङका अध्यक्ष तथा जिल्ला समन्वय समितिका प्रमुख सनबहादुर राईको अध्यक्षतामा चैत १ गते बसेको बैठकले कुमार आचार्यको नेतृत्वमा तीन सदस्यीय छानविन समिति समेत निर्माण गरिएको हो । छानविन समितिले छानविन गरी दोषी ठहरिए कारबाहीको सिफारिससम्म गर्ने गरी एक महिनाभित्र छानविन रिपोर्ट पेश गर्ने राईले बताए ।
बैठकले ५० बेडको अस्पताल भवन अन्तिम चरणमा पुगेकाले अस्पताल आवासगृह माग गर्ने, मृगौलाको डायलासिस सेवाका लागि आवश्यक पहल गर्ने लगायतको समेत निर्णय गरिएको छ ।