जेष्ठ नागरिक र अपाङ्गता भएकालाई निःशुल्क स्वास्थ्य विमा

नमस्ते खोटाङ संवाददाता–
खोटाङ, फागुन ३–साकेला गाउँपालिकाले बृद्ध–बृद्धा तथा अपाङ्गता भएकाहरुलाई निशुल्क रुपमा विमा कार्ड वितरण गरेको छ । स्वास्थ्यमा पहुँच विस्तार गर्न निशुल्क विमा कार्ड वितरण गरेको हो ।
७० वर्ष माथिका चार सय सात जना जेष्ठ नागरिक र २१ जना पूर्ण अपाङ्गता भएकाहरुलाई निःशुल्क स्वास्थ्य विमा कार्ड उपलब्ध गराइएको उक्त गाउँपालिका सामाजिक विकास शाखाका डिएम चाम्लिङले बताए । स्वास्थ्य विमा भएकाहरुले स्वास्थ्य विमा कार्यक्रम लागू भएका अस्पतालहरुबाट एक लाख रुपैयाँसम्म औषधि उपचारमा छुट हुने गाउँपालिका अध्यक्ष रविप्रकाश राईले बताए । पूर्ण अपाङ्गता भएका नागरिकहरुको हकमा एकाघरका अन्य सदस्यहरुको पनि निशुल्क स्वास्थ्य विमा गरिने राईले जनाए ।
उक्त विमा कार्ड बाँझेच्यानडाडाँको सेखुवा, बाँझे र डाडाँगाउँमा वितरण गरिएको हो । विमा कार्ड वितरण सहित वडा कार्यालयसम्म आएर मालपोत तिर्न नसकेकाहरुलाई टोलमै सुविधा दिइएको राईले सुनाए ।
गाउँपालिकाकी स्वास्थ्य शाखा संयोजक रीता ढकालका अनुसार वडा नं १ बाँझेच्यानडाडाँका एक सय दुई जना जेष्ठ नागरिक र चार जना पूर्णअपाङ्गता, वडा नं २ रतन्छाका एक सय तीन जना जेष्ठ नागरिक र पाँच जना पूर्णअपाङ्गता, वडा नं ३ खिदिमाका २६ जना जेष्ठ नागरिक र तीन जना पूर्णअपाङ्गता, वडा नं ४ मात्तिमका ९८ जना जेष्ठ नागरिक र चार जना पूर्णअपाङ्गता भएका तथा वडा नं. ५ मात्तिमबिर्ताका ७८ जना जेष्ठ नागरिक र ५ जना पूर्णअपाङ्गता भएकाहरुले निशुल्क स्वास्थ्य विमा गरिएको छ ।
तस्बिर सौजन्य ः डिएम चाम्लिङ