छ पटक म्याद थप्दा पनि सकिएन स्वास्थ्य चौकी भवन

नमस्ते खोटाङ संवाददाता–
खोटाङ, पुस २३–साकेला गाउँपालिका–५ मात्तिमविर्तास्थित निर्माणाधीन स्वास्थ्य चौकी भवन सुरु भएको सात वर्षमा पनि अझै सकिएको छैन । २०७४ सालमै सक्नु पर्ने भवन अझै अपूरै रहेको हो ।
करिब दुई करोड १६ लाख ५९ हजार छ सय ७० रुपैयाँको लागतमा २०७४ कात्तिक २० गतेभित्र सक्ने गरी युएस नाना जेभीले २०७२ कात्तिक २० गते संझौता भएको थियो । तर पटक–पटक म्याद थप गर्दै काम भने नगरेको वडाअध्यक्ष जीवन न्यौपानेले बताए । उनका अनुसार छ पटकसम्म म्याद थप गरिएको छ । पहिलो पटक २०७५ बैशाख २१ गते, दोश्रो पटक २०७५ माघ २९, तेश्रो पटक २०७७ असार ३१, चौथो पटक २०७७ पुस मसान्त, पाँचौ पटक २०७८ चैत ३० र छैटौ पटक २०७९ पुसमसान्तसम्मका लागि थपिएको न्यौपानेले बताए ।
पटक–पटक म्याद थप गरिए पनि भवनको भित्री भागको धेरै कामहरु बाँकी नै रहेको न्यौपानको भनाई छ । झ्यालको सिसा, भित्री भागको रङ–रोगन, ट्वाइलेट–बाथरुममा धाराहरु, बर्थिङ सेन्टरको बेसिन, टायल बिछ्याउँन लगायतका काम बाँकी छन् । यसबाहेक रिटेनिङवाल, ग्याबिनवाल लगायतका काम पनि बाँकी नै रहेको न्यौपानेले बताए ।
निर्माण सकिएको काम पनि गुणस्तरहीन भएको न्यौपानेको भनाई छ । सिलिङबाट पानी चुहिने भएकाले समस्या देखा परेको छ । यसबारेमा निर्माण कम्पनीलाई जानकारी गराइएको र उनले मर्मत गर्ने बताएको न्यौपानेले सुनाए ।
बेलामा काम नसक्दा उपचारमा समस्या आएको छ । स्वास्थ्य चौकीमा दिने सेवा पुरानो गाविस भवनमा र बर्थिङ सेन्टरको सेवा स्थानीय महिला सशक्तिकरण समूहको भवनबाट दिइरहेको न्यौपानेले सुनाए । ठेक्का लिने निर्माण कम्पनीले सुजन भट्टलाई पेटी ठेक्का दिएको, उनले पनि स्थानीय सन्दोष राईलाई काम लगाएको र उनीहरु बीच लेनदेनको विषयमा समस्या देखिएकाले यो समस्या आएको निर्माण कम्पनी सम्बद्ध रमेश श्रेष्ठले बताए । भट्टले पनि लेनदेनको विषयमा समस्या आएकाले काम गर्न बाधा आएको बताए । काम गर्ने वातावरण भए दश–पन्ध्र दिनमा सकिने भट्टले सुनाए । कामदारको पैसा नै नदिएकाले यो समस्या आएको जानकारी आएको न्यौपानेले बताए ।