लफ्याङमा फुटबल प्रतियोगिता हुदै

प्रकाशित मितिः पुष २१, २०७७
865 पटक पढिएको
संवादताता

सविना अछामे–
खोटाङ, पुस २१–आगामी फागुन १० गतेबाट मझुवागढी रणजितमान राई अन्तर वडा जिल्ला स्तरीय पुरुष फुटवल प्रतियोगिता हुने भएको छ । दिक्तेल रुपाकोट मझवागढी नगरपालिका–५ लफ्याङस्थित रणजितमान राई खेल मैदानमा प्रतियोगिता हुन लागेको हो ।
‘जितलाई हैन सिक्नलाई खेलकुद भन्ने नाराका साथमा खेल हुने पुस १९ गते जिल्ला समन्वय समितिको सभाहलमा आयोजित पत्रकार सम्मेलनमा जनाइएको थियो । उक्त खेल दिक्तेल रुपाकोट मझुवागढी नगरपालिका वडा नं–५ लफ्याङ र नमुना स्पोर्टस क्लव लफ्याङले आयोजना गरेको पत्रकार सम्मेलनमा जानकारी गराइएको थियो । पत्रकार सम्मेलनमा फुटबल संघ खोटाङका जिल्ला अध्यक्ष ध्रुबबिक्रम राई, वडा नं ५ लफ्याङका वडासदस्य अनुप राई, स्थानीय समाजसेवी राजेन्द्र राई लगायतको उपस्थिति थियो ।
लफ्याङमा निर्माणाधीन मझुवागढी रणजितमान राई खेलमैदानमा सञ्चालन हुने प्रतियोगितामा प्रथम स्थान प्राप्त गर्ने टिमले नगद एक लाख ५५ हजार, दोश्रो स्थान हासिल गर्ने टिमले एक लाख एक हजार र सेमिफाइनलिस्ट दुई वटा टिमले ३१÷३१ हजार नगद पुरस्कार पाउने दिक्तेल रुपाकोट मझुवागढी नगरपालिका–५ वडाध्यक्ष निर्मल राईले बताए ।
विधागत पुरस्कातर्फ उत्कृष्ट गोल रक्षक, डिफेन्डर, मिड फिल्डर, प्रशिक्षक र अनुशासित टिमलाई नगद ५÷५ हजार र उत्कृष्ट खेलाडीलाई ५ हजार ५ सय नगद पुरस्कार प्रदान गरिने वडाध्यक्ष राईले बताए ।