दिक्तेलमा ६१ हजार बढीको म्याद नाघेका उपभोग्य वस्तु बरामत (भिडिओ सहित)

नमस्ते खोटाङ संवाददाता–
खोटाङ, असोज १–जिल्ला सदरमुकाम दिक्तेलमा बजार अनुगमन गर्दा ६१ हजार भन्दा बढीको म्याद नाघेको उपभोग्य वस्तु बरामद गरिएको छ । तीन दिनसम्म गरिएको बजार अनुगमनमा ६१ हजार ६ सय ६५ रूपैयाँ बराबरको म्याद नाघेको उपभोग्य वस्तु बरामद गरिएको हो ।
घरेल तथा साना उद्योग कार्यालय खोटाङका प्रमुख भेषराज खत्रीका अनुसार भदौ ३० गते किरातचोकदेखि मानव अधिकार चोकसम्मका २४ वटा किराना पसल अनुगमन गर्दा २५ हजार ९ सय ८३ रूपैयाँ, भदौ ३१ गते मानव अधिकार चोकदेखि बैंक चोकसम्मका २४ वटा किराना पसलहरू अनुगमन गर्दा २६ हजार ५ सय ३० रूपैयाँ र असोज १ गते बैंकचोकदेखि हाटडाँडा हुदै अस्पताल चोकसम्मका १८ वटा किराना पसल अनुगमन गर्दा ९ हजार एक सय ५२ रूपैयाँ बराबरको म्याद नाघेको उपभोग्य वस्तु बरामद गरिएको हो ।
मिक्स जुस, करेन्ट खुर्सानी, विस्कुट, बिरेनुन, बेसारको धुलो, डिउ, स्प्राइट, थुक्पा, पापड, टमाटर सस, चोकोपन, बेसन पिठो लगायतका म्याद नाघेको उपभोग्य वस्तु बरामत गरिएको खत्रीले सुनाए । उक्त बरामत गरिएका सामान जिल्ला प्रशासन कार्यालय खोटाङको परिसरमा जलाएर नष्ट गरिएको छ ।
जिल्ला प्रशासन, घरेलु तथा साना उद्योग विकास कार्यालय, प्रहरी, दिक्तेल रूपाकोट मझुवागढी नगरपालिका, खोटाङ उद्योग वाणिज्य संघ लगायतको संयुक्त टोलीले अनुगमन गर्दा उक्त सामग्री बरामत गरिएको हो ।