तापखोलामा महिला मृत अवस्थामा फेला

नमस्ते खोटाङ संवाददाता–
खोटाङ, असोज १५–जिल्लाको केपिलासगढी गाउँपालिका–२ खार्ताम्छामा एक महिला मृत फेला परेकी छन् । स्थानीय ६० वर्षीय ठकुरी राई स्थानीय तापखोलामा बिहीबार विहान मृत फेला परेकी हुन् ।
बुधबारदेखि सम्पर्क बिहीन राई बिहीबार बिहान घरभन्दा तलको तापखोलाको बगरमा मृत फेला परेको प्रहरी नायव उपरीक्षक नारायणप्रसाद चिमरीयाले बताए । सम्पर्क विहीन भएपछि खोजी गर्दा पानीले बगाएर बगरमा अड्किएको अवस्थामा फेला परेको डिएस्पी चिमरीयाले सुनाए ।
राई खोलामा फड्ने तर्ने क्रममा खोलामा पानीमा खसेको हुन सक्ने अनुमान गरिएको प्रहरीले जनाएको छ । उनी माइतीबाट घर फर्कने क्रममा बेपत्ता भएको भन्दै आफन्तले खोजीका लागि प्रहरी चौकी खार्ताम्छामा अनुरोध गरेका थिए ।