जिल्ला अस्पताल खोटाङबाट रेफर भएकी युवतीमा कोरोना

नमस्ते खोटाङ संवाददाता–
खोटाङ, भदौ ८–जिल्ला अस्पताल खोटाङबाट चार दिन अघि रेफर भएकी दिक्तेल रुपाकोट मझुवागढी नगरपालिका–३ बाम्राङकी १६ वर्षीया युवतीमा कोरोना पुष्टि भएको छ । जिल्ला अस्पताल खोटाङबाट गत भदौ ४ गते रेफर भएकी युवतीको भदौ ८ गते कोरोना पुष्टि गरेको हो ।
उनी भदौ २ गते जिल्ला अस्पताल भर्ना भएकी थिइन् । पखाला र ज्वरोले सिकिस्त भएपछि अस्पताल भर्ना गरिएको जिल्ला अस्पताल खोटाङका डा. शैलेश श्रेष्ठले बताए । ‘अस्पतालको इमर्जेन्सी र जनरल वार्डमै राखिएकाले अन्यलाई तथा स्वास्थ्यकर्मीलाई समेत जोखिम छ ।’ डा. श्रेष्ठले भने–‘स्वास्थ्यकर्मीहरुको स्वाव सङ्कलन गरेर भोलि नै परीक्षणमा पठाइने छ ।’
आकस्मिक र प्रसुति बाहेक अस्पतालको अन्य सेवा बन्द गर्ने तयारी गरिएको प्रमुख जिल्ला अधिकारी शालिग्राम शर्मा पौडेलले बताए । उक्त समयमा ड्युटीमा नरहेका स्वास्थ्यकर्मीहरुलाई मात्र खटाइने प्रजिअ शर्मा पौडेलले बताए । उक्त युवतीको ट्राभलहिस्ट्री समेत नरहेको प्रजिअ शर्मा पौडेलले बताए ।