चोरले यसरी निकाले बैंकबाट रकम
- प्रकाशित मितिः असार ३१, २०७५
- 3232 पटक पढिएको
- संवादताता
नमस्ते खोटाङ संवाददाता
खोटाङ, असार ३१–अनुदानको प्रलोभनमा पारेर पीडिक बनेका किसानमध्येका खोटाङ नेर्पाका सन्तु गुरुङको खाताको रकम चोर्ने व्यक्तिले काठमाडौंस्थित सरस्वतीनगर शाखाबाट दिउसो दुई बजेर २७ मिनेट जादा निकालेको खुलासा भएको छ । एक युवतीसंग पसेका जितन्द्र बताउने व्यक्तिले बैंक प्रवेश गरेको करिब दश मिनेट भित्र रकम निकालेका हुन् । उनीहरु करिब दुई बजेर १९ मिनेतमा बैंक प्रवेश गरेको देखिन्छ ।
जितेन्द्रसंग बैंक प्रवेश गरेकी युवतीको भने चेकमा हस्ताक्षर नमिलेपछि त्यत्तिकै बाहिरिएकी थिइन् । सिसि क्यामेरामा अनुहार छल्न दुबै जनाले क्याप लगाएका छन् । युवतीको अनुहार चिनिने अवस्थामा देखिन्छ भने जितन्द्रको भने पूरै नचिनिने गरी बैंकमा गतिविधि गरेको देखिन्छ । यद्यपि पसिना पुछेको भने देखिन्छ । रकम निकाल्ने बेला फोनमा संवाद भएको देखिन्छ । यो अवस्थालाई हेर्दा प्रहरीले पक्राउ गर्न सक्ने अवस्थाको देखिन्छ ।
अनुदान दिने प्रलोभनमा दुई दर्जन बढी किसानलाई ठगी गरेको खुलासा भएको छ । कृषिसम्वन्धी विभिन्न फर्म सञ्चालन गर्ने किसानहरुलाई ७० प्रतिशत अनुदान दिने प्रलोभनमा खोटाङका दुई दर्जन बढी किसानलाई ठगी गरेको हो ।
विभिन्न बहानामा खोटाङका किसानलाई ७० प्रतिशतका दरले अनुदान दिने भनेपछि जिल्लाका करिब दुई दर्जन बढी किसान ठगीमा परेको प्रहरी नायव उपरीक्षक लोकदर्शन थापाले बताए । ठगीको शिकार बनेका दिक्तेलस्थित साकेला पोल्ट्री फर्मका प्रबन्धक रमेश राईका अनुसार अर्बा नामको इज्रायली कम्पनीका प्रतिनिधि भन्दै जितेन्द्र राई नाम गर्ने व्यक्तिले प्रति फर्म तथा व्यक्तिको दुई लाख ५० हजार रुपैया“का दरले ठगी गरेको हो ।
उनका अनुसार आफ्नै खातामा दुई लाख ५० हजार जम्मा गरेपछि अर्बा कम्पनीले त्यसको ७० प्रतिशत रकम अनुदान दिने भनेपछि आफूहरु ठगीमा परेको बताए । ‘हामी सोझासाझा मान्छे, अर्बा कम्पनीले ७० प्रतिशत अनुदान दिने भनेपछि मक्ख परियो ।’ उनले भने–‘खातामा भएको रकम पनि विभिन्न बहानामा खाली चेक मागेर निकाली फरार भए ।’
ठगीमा पर्ने मध्येका दिक्तेल रुपाकोट मझुवागढी नगरपालिका–९ का नगेन्द्र राईका अनुसार राष्ट्रिय वाणिज्य बैंकबाट १६ जना, बैंक अफ काठमाण्डूबाट तीन जना र ज्योति विकास बैंकबाट एक जनाको गत असार २८ गते रकम चोरी भएको हो । यसबाहेक अन्यको चोरी भएको तर जानकारीमा भने नआइसकेको राईले बताए । ‘हामीजस्तो थुप्रैलाई अनुदान दिने भनेर प्रलोभनमा पारिएको छ ।’ राईले भने–‘अहिलेसम्म थाहा हुन आएको २० जना छ, अरुको पनि खाताबाट रकम चोरिएको हुनसक्छ ।’
दिक्तेलस्थित राष्ट्रिय वाणिज्य बैंक शाखा प्रबन्धक शिरोमणि बरालले भने पैसा चोरी गर्ने व्यक्तिलाई खाली चेक दिएपछि चोरी भएको बताएका छन् । डिएस्पी थापाका अनुसार धेरैजसो रकम चाबहिल क्षेत्रका बैंकहरुबाट निकालिएको पाइएको छ । सोझासाझालाई विभिन्न बहानामा ठगी गरी फरार भएकाले खोजी सुरु भएको डिएस्पी थापाले बताए । यसबारेमा उजुरी समेत परेको डिएस्पी थापाले सुनाए । ठगिनेमा निर्मलीडाडा, दोर्पा, नेर्पा, दिक्तेल, बाम्राङ, बुइपा, गोपेनी लगायतका किसान परेका छन् ।
