साकेला गाउँपालिकाको सामाजिक सुरक्षा भत्ता भुक्तानी शिविरको चौथो दिन एक सय १८ लाभग्राहीलाई २३ लाख बढी वितरण

नमस्ते खोटाङ संवाददाता–
खोटाङ, असोज २६–साकेला गाउँपालिकाले सञ्चालन गरेका सामाजिक सुरक्षा भुक्तानी शिविरको चौथो दिन एक सय १८ जना लाभग्राहीलाई सामाजिक सुरक्षाभत्ता वितरण गरेको छ । लाभग्राहीलाई सुविधा दिने उद्देश्यले उक्त गाउँपालिकाको वडा नं २ रतन्छामा असोज २६ गते आयोजना गरिएको शिविरमा एक सय १८ जना लाभग्राहीलाई २३ लाख ९८ हजार रूपैयाँ वितरण गरिएको हो ।
शिविरको तेश्रो दिन उक्त गाउँपालिकाको वडा नं ३ खिदिमामा असोज २४ गते भएको शिविरमा ७७ लाभग्राहीलाई १५ लाख ९६ हजार रूपैयाँ, शिविरको दोश्रो दिन असोज २३ गते उक्त गाउँपालिकाको वडा नं १ बाँझेच्यानडाडाँको डाडाँगाउँस्थित चण्डेश्वरी माविमा आयोजना गरिएको शिविरमा ९३ जना लाभग्राहीलाई १९ लाख ८ हजार रूपैयाँ र शिविरको पहिलो दिन असोज २२ गते बाँझेच्यानडाडाँको वडा कार्यालय र सेखुवाको डाडाँटोलमा भएको शिविरमा ९१ जना लाभग्राहीलाई १९ लाख ८२ हजार सामाजिक सुरक्षा भत्ता वितरण गरिएको उक्त गाउँपालिकाका सामाजिक सुरक्षा शाखाका संयोजक डिएम चाम्लिङले बताएका छन् । असोज २७ गते मात्तिमबिर्तामा सामाजिक सुरक्षा भत्ता वितरण गरिने छ । वडा नं ४ मात्तिमका लाभग्राहीले भने नेपाल एसबिआइ बैंकको शाखाबाटै सामाजिक सुरक्षा भत्ता लिइरहेका छन् ।
उक्त गाउँपालिकामा एक हजार ३ सय ३४ जना लाभग्राही छन् । यसका लागि पहिलो त्रैमासिकमा एक करोड ३२ लाख निकासा भएको चाम्लिङले सुनाएका छन् ।