भरुवा बन्दुक देखाएर रकम असुलीको प्रयास गरेको अभियोगमा पक्राउ परेका राई धरौटीमा छुटे

नमस्ते खोटाङ संवाददाता–
खोटाङ, असोज २३–भरुवा बन्दुक देखाएर रकम असुलीको आरोपमा पक्राउ परेका नेपाली कांग्रेस खोटाङका सदस्य श्यामकुमार राई धरौटीमा छुटेका छन् । गत भदौ १६ गते खार्मीबाट दिक्तेल आउँदै गरेको ना १ ज ४३७२ नम्बरको सुमो चालकलाई भरुवा बन्दुक देखाएर रकम असुली गर्न खोजेको आरोपमा पक्राउ परेका राईलाई असोज २२ गते तीन लाख ५० हजार धरौटीमा छुटेका हुन् ।
दिक्तेल रूपाकोट मझुवागढी नगरपालिका–११ खार्मी स्थायी घर भएका राई निमित्त श्रेष्तेदार बाबुराम बस्नेतको आदेशले छुटेका हुन् । उक्त घटना लगत्तै फरार राई भदौ २० गते प्रहरीमा उपस्थित भएका थिए । राईमाथि डाका उद्योगमा भदौ १८ गते मुद्दा दर्ता गरी अनुसन्धान गरी सरकारी वकिल मार्फत अदालतमा बुझाइएको जिल्ला प्रहरी कार्यालय खोटाङका सूचना अधिकारी प्रहरी निरीक्षक राजु विष्टले बताएका छन् ।