‘विद्या भण्डारी अब सक्रिय राजनीतिमा आउनु हुन्न’ : विशाल भट्टराई (भिडिओ सहित)

नमस्ते खोटाङ संवाददाता–
खोटाङ, भदौ ९–एमाले नेता विशाल भट्टराईले पूर्व राष्ट्रपति विद्यादेवी भण्डारीलाई सक्रिय राजनीतिमा फर्कन नहुने निर्णय गरेर एमालेको मात्र नभइ देशकै सम्मानित नेताको रूपमा राखेको बताएका छन् । भदौ ९ गते दिक्तेलमा आयोजित पत्रकार सम्मेलनमा बोल्दै भट्टराईले सम्मानित राष्ट्रपतिजस्तो ठाउँमा पुगिसकेको व्यक्तिलाई सक्रिय राजनीतिमा ल्याउनु गणतन्त्रका लागि चुनौति र पार्टीको आन्तरिक जीवनका लागि पनि त्यत्ति सुखत् नभएको बताएका हुन् ।
साउन ५ देखि ७ गतेसम्म भएको एमालेको केन्द्रीय कमिटीको बैठकमा २ सय ४८ केन्द्रीय कमिटीका नेताहरूमध्ये बहुसंख्यकले राष्ट्रपतिलाई राजनीतिमा फर्कन उपयुक्त नहुने निर्णय गरेकाले अब विद्या भण्डारी पार्टीको सक्रिय राजनीतिमा नफर्कने भट्टराईले बताए । यो निर्णय पार्टीका लागि मात्र नभई भण्डारीकै लागि पनि सम्मान भएको भट्टराईको दाबी छ ।
भण्डारीलाई सदस्यता नवीकरण गरेर सक्रिय राजनीतिमा ल्याउन तल्लो तहमा समेत आवाज उठे पनि बहुमतले गणतन्त्रको प्रतिक, राष्ट्रको सर्वोच्च पदमा पुगेका व्यक्तिलाई सक्रिय राजनीतिमा फर्कन नहुने निष्कर्षमा पुगेको भट्टराईले बताएका छन् ।
पत्रकार सम्मेलनमा आइतबार भएको एमाले कोशी प्रदेश इन्चार्ज शेरधन राईको प्रमुख आतिथ्यतामा भएको विधान महाधिवेशनका लागि जिल्लास्तरीय सुझाव सङ्कलन, दोश्रो सचिवालय बैठकको निर्णय समेत प्रस्तुत गरिएको थियो । उक्त निर्णय एमाले खोटाङका अध्यक्ष देवविक्रम राईले प्रस्तुत गरेका हुन् ।