हलेसी दर्शन गरेर सिरहा फर्किदै गरेको गाडी दुर्घटना, एक जनाको मृत्यु

नमस्ते खोटाङ संवाददाता–
खोटाङ, साउन १९–हलेसीमा दर्शन गरेर सिरहा फर्कदै गरेको गाडी साउन १९ गते विहान दुर्घटना भएको छ । प्र २– ०–१–००१ ज ००५३ विङ्गर गाडी हलेसी तुवाचुङ नगरपालिका–१ बाहुनीडाडाँस्थित डौठे खोलामा विहान करिब ८ बजेर ३५ मिनेट जादा दुर्घटना भएको हो ।
सिरहा नराहा नगरपालिका वडा न ५ फर्कदै गरेको गाडी दुर्घटनामा परी एक जनाको मृत्युको भएको हलेसी तुवाचुङ नगरपालिकाका प्रवक्ता कमल गिरीले बताएका छन् । मृतकको पहिचान हुन नसकेको गिरीले बताए । अन्यको अवस्था पनि चिन्ताजनक भएको गिरीले बताएका छन् । तीन जना घाइतेलाई हलेसी तुवाचुङ नगरपालिकाको एम्बुलेन्स मार्फत घुर्मीस्थित प्राथमिक स्वास्थ्य केन्द्रमा उपचारका लागि पठाइएको गिरीले बताएका छन् । गाडी करिब दुई सय मिटर तल झरेको र दुर्घटनामा यात्रु छरिएकाले खोजी तथा उद्धार भइरहेको जिल्ला प्रहरी कार्यालय खोटाङका सूचना अधिकारी सुशान्त मिश्रले बताएका छन् । उक्त गाडीमा १७ जना सवार रहेको अनुमान गरिएको र घटनाबारे विस्तृत जानकारी आउन बाँकी रहेको प्रहरीले जनाएको छ ।