वडा सचिवमाथि अभद्र गरेको भन्दै प्रहरीमा जाहेरी

नमस्ते खोटाङ संवाददाता–
खोटाङ, फागुन १–दिक्तेल रूपाकोट मझुवागढी नगरपालिका–१५ विजयखर्कका वडा सचिव होमनाथ ढकालमाथि कार्यालयमै अभद्र व्यवहार भएको भन्दै जिल्ला प्रहरी कार्यालय खोटाङमा जाहेरी परेको छ । माघ २८ गते दिउसो साडे २ बजे कार्यालयमै अभद्र गरेको भन्दै बुधबार जाहेरी परेको हो ।
वडा सदस्य टंक पोखरेलका अनुसार ढुङ्गे चौतारा–कामीडाडाँ हुदै सरोज राईको घरसम्मको सडक निर्माणको विषयमा विवाद हुदा वडा सचिवमाथि अभद्र व्यवहार भएको हो । स्थानीय वरुण ढकाल, नरेन्द्र ढकाल, राजकुमार ढकाल, गणेशबहादुर कार्की, खड्गबहादुर कटवाल र वडा सदस्य युवबहादुर कार्कीले घोक्राइ मन्टाइ गरी अभद्र व्यवहार गरेकाले उनीहरू विरुद्ध जाहेरी दिएको वडा सचिव होमनाथ ढकालले बताए । ‘माघ २८ गते प्रहरीकै अगाडि कार्यालयमै अभद्र व्यवहार गरियो’–ढकालले भने–‘कानुनी राज्यमा कार्यालयभित्रै अभद्र व्यवहार भएपछि माघ २९ गते निवेदन र ३० गते जाहेरी दिएको छु ।’
त्यस्तै ढुङ्गे चौतारा–कामीडाडाँ हुदै सरोज राईको घरसम्म जाने सडक निर्माणले घर जोखिममा परेको भन्दै प्रहरीमा निवेदन परेको छ । दुवै तर्फबाट उजुरी परेकाले दुवै पक्षलाई बोलाएर छलफल गर्ने प्रहरी नायव उपरीक्षक प्रतिक विष्टले बताए । ‘एक पक्षले अभद्र भयो भनेर जाहेरी दिएको छ, अर्कोपक्षले घर जोखिममा प¥यो भनेर निवेदन दिएको छ’ विष्टले भने–‘दुवैपक्षलाई छलफल गराइन्छ ।’