थामे बाढी : हिमताल फुटेर बाढी आएको पुष्टि (भिडियो सहित)

नमस्ते खोटाङ संवाददाता–
खोटाङ, भदौ १–सोलुखुम्बुको खुम्बु पासाङल्हामु गाउँपालिका–५ थामे गाउँभन्दा माथिको खुम्बु क्षेत्रका दुई वटा हिमताल फुटेर साउन ३२ गते थामेमा बाढी आएको पुष्टि भएको छ । रक्षामन्त्री मानवीर राई नेतृत्वको सुरक्षा अधिकारीहरुको टोलीले भदौ १ गते बिहान बाढी प्रभावित क्षेत्रको हेलिकप्टरबाट निरीक्षण गर्दा थामेभन्दा माथि रहेको पाँचमध्ये दुई वटा हिमताल फुटेर बाढी आएको पुष्टि भएको हो ।
सोलुखुम्बुकी प्रमुख जिल्ला अधिकारी देवी पाण्डेका अनुसार गाउँभन्दा माथि रहेका पाँच वटा हिमतालमध्ये दुई वटा फुटेर बाढी आएको देखिएको छ । अरु दुई वटा हिमताल फुट्ने जोखिममा रहेको र एउटा हिमताल भने सुरक्षित देखिएको प्रमुख जिल्ला अधिकारी पाण्डेले बताइन् ।
अझै दुई वटा ताल फुट्न सक्ने जोखिम देखिएकाले थामे तथा नदी आसपासका क्षेत्रमा बसोबास गर्नेहरूलाई सतर्कता अपनाउन आग्रह गरिएको बताइन् ।
साउन ३२ गते दिउँसो थामे खोलामा आएको बाढीले थामेका २० घर तथा होटल लज, एउटा विद्यालय, स्वास्थ्यचौकी र स्थानीय विद्युत् आयोजनाको विद्युत् गृह पूर्ण रूपले क्षतिग्रस्त बनाएको थियो । यसका साथै खुम्बु पासाङल्हामु–३ फाक्दिङदेखि नाम्चे क्षेत्रमा करिब दुई सय मिटर पदमार्ग कटान गरेको छ ।