दिक्तेल फुटबल रङ्गशाला अलपत्र छाड्दा भेटेरीनरी अस्पतालको सौचालय भत्कियो (भिडियो सहित)

प्रकाशित मितिः साउन २४, २०८१
814 पटक पढिएको
संवादताता

सविना अछामे–
खोटाङ, साउन २४–दिक्तेल रूपाकोट मझुवागढी नगरपालिका–१ दिक्तेल माटिकोरेस्थित दिक्तेल फुटबल रङ्गशाला निर्माणको काम अलपत्र छाड्दा भेटेरीनरी अस्पताल तथा पशु सेवा विज्ञ केन्द्रको सौचालय भत्किएको छ । रङ्गशाला निर्माण गर्दा भित्तापट्टी खनेर त्यत्तिकै छाडिएकाले पहिरोले सौचालय भत्किनुका साथै कार्यालय समेत जोखिममा परेको छ ।
कार्यालयको तल्लो भाग चर्किएको छ । निर्माण कम्पनीले बेलामा काम नसक्दा यो अवस्था आएको भेटेरीनरी अस्पताल तथा पशुसेवा विज्ञ केन्द्र खोटाङका प्रमुख चन्द्रकिशोर यादवको भनाई छ ।
उक्त रङ्गशाला निर्माणको ठेक्का आशिर्वाद÷मोहन एण्ड गाउँबेसी÷इन्द्रलक्ष्मी कन्ट्रक्सन जेभीले लिएको थियो । दिक्तेल रूपाकोट मझुवागढी नगरपालिकाको दुई करोड ९६ लाख ४१ हजार चार सय ९५ रूपैयाँको लागतमा २०८१ बैशाख २८ गतेसम्ममा सक्ने गरी २०७९ बैशाख २९ गते संझौता गरेको थियो । उक्त निर्माण कम्पनीले मोबिलाइजेसन पेश्की वापत २९ लाख ६४ हजार लिएर काम थालेर अलपत्र पारेपछि यो अवस्था आएको हो । निर्माण व्यवसायीका कारण यो अवस्था आएको र यसको जिम्मेवारी पनि स्वयम् निर्माण व्यवसायीले नै लिनु पर्ने नगरपालिकाका सूचना अधिकारी तथा निमित्त प्रमुख प्रशासकीय अधिकृत मोहनकुमार भट्टराईको भनाई छ ।
उक्त रङ्गशालाको स्टिमेट परिवर्तन भएकाले काममा ढिलाई भएको निर्माणमा संलग्न जोसेफ रिजालले बताउदै आएका छन् ।