एसइइमा मौका परीक्षा दिने विद्यार्थीका लागि निःशुल्क ट्युसन कक्षाको उद्घाटन

नमस्ते खोटाङ संवाददाता–
खोटाङ, असार ३१–एसइइमा मौका परीक्षा दिने विद्यार्थीका लागि सञ्चालन गरिएको निःशुल्क ट्युसन कक्षाको उद्घाटन गरिएको छ । अखिल क्रान्तिकारी खोटाङ र एकीकृत अखिल शिक्षक संगठनको संयुक्त आयोजनामा असार २७ गते सुरु गणित विज्ञान र अग्रेजी विषयको निःशुल्क ट्युसन कक्षाको असार ३१ गते नेकपा माओवादी केन्द्र खोटाङका सहइन्चार्ज सुरेश राईले उद्घाटन गरेका हुन् ।

विद्यार्थीहरू शिक्षाबाट बन्चित नहोस् भन्ने उद्देश्यले निःशुल्क ट्युसन कक्षा सञ्चालन गरिएको अखिल क्रान्तिकारी खोटाङका संयोजक डार्विन चाम्लिङले बताए । ‘सबैको छेरा–छोरी अखिल क्रान्तिकारी’ भन्ने मुल नाराका साथ निःशुल्क ट्युसन कक्षा सञ्चालन गरिएको चाम्लिङले सुनाए । उनका अनुसार साउन १९ गतेसम्म सञ्चालन हुने ट्युसन कक्षामा एसइइ मौका परीक्षा दिन पाउने जिल्लाभरका करिब ८० जना विद्यार्थी सहभागी भएका छन् । उक्त कक्षामा दक्ष तथा अनुभवी शिक्षकबाट कक्षा सञ्चालन गरिएको चाम्लिङको भनाई छ ।