१३ वर्षीया छात्रा बलात्कार आरोपमा शिक्षक पक्राउ

नमस्ते खोटाङ संवाददाता–
खोटाङ, असार १५–१३ वर्षीया छात्रालाई बलात्कार गरेको अभियोगमा एक शिक्षक पक्राउ परेका छन् । हलेसी तुवाचुङ नगरपालिका–११ राजापानीस्थित ज्योति माविका शिक्षक ५८ वर्षीय शम्भुप्रसाद घिमिरे असार १५ गते पक्राउ परेका हुन् ।
स्थानीयका अनुसार बालिका गर्भवती भएको र छलफलमा बोलाउँदा समेत घिमिरे नआएपछि प्रहरीमा जानकारी गराइएको हो । घटनामा संलग्नलाई पक्राउ गरिए पनि पीडितको गोपनीयताका कारण विस्तृत विवरण भने नखुलाइएको जिल्ला प्रहरी कार्यालय खोटाङका प्रहरी नायव उपरीक्षक पुरुषोत्तम खड्काले बताए । ‘पीडितको गोपनीयताका कारण विस्तृत विवरण दिन मिल्दैन,’ डिएसपी खड्काले भने–‘भोलि आइतबार म्याद थप गरेर अनुसन्धान बढाउछौं ।’