नाबालिकालाई वेश्यावृत्तिमा लगाउने बार सञ्चालक पक्राउ

नमस्ते खोटाङ संवाददाता–
काठमाडौं, जेठ १४—नाबालिकालाई वेश्यावृतिमा लगाएको अभियोगमा २ जना महिलालाई प्रहरीले पक्राउ गरेको छ । दोलखाको जिरी नगरपालिका–९ घर भएकी २५ वर्षीया मञ्जु भन्ने सिर्जना खनाल तामाङ घिसिङ र नुवाकोट वेलकोटगढी नगरपालिका–४ घर भएकी २६ वर्षीय निशा भन्ने रमिला नेपाली पक्राउ परेका हुन् ।
काठमाडौं महानगरपालिका–७ स्थित स्वागतम् रेष्टुरेन्ट एण्ड बारमा नाबालिकालाई जबरजस्ती वेश्यावृतिमा लगाएको भन्ने सूचनाको आधारमा मानव बेचबिखन अनुसन्धान ब्यूरो बबरमहलबाट खटिएको प्रहरीले बार संचालक उनीहरूलाई पक्राउ गरेको र पीडित बालिकाको पनि उद्दार गरिएको प्रहरीले जनाएको छ ।
उनीहरूले नाबालिकाको कमजोर आर्थिक अवस्थाको फाइदा लिई रेष्टुरेन्टमा वेट्रेसको काम लगाउने भनी जबरजस्ती वेश्यावृतिमा लगाई दैनिक रूपमा ५ देखि १५ जना ग्राहकहरूसंग शारीरिक सम्पर्क राख्न बाध्य बनाएको र ग्राहकसंग शारीरिक सम्पर्क राखे बापत आधा रकम दिने भनी प्रलोभनमा पारी उक्त रकम पनि नदिएको प्रारम्भिक अनुसन्धानबाट खुल्न आएको छ ।
उनीहरू उपर मानव बेचबिखन तथा ओसारपसार मुद्दामा जिल्ला अदालत काठमाडौंबाट ३ दिन म्याद थप अनुमति लिई यस सम्बन्धमा प्रहरीले आवश्यक अनुसन्धान गरिरहेको छ ।