रक क्लाइम्बिङ गर्ने क्रममा खसेर निधन भएका कांग्रेस युवा नेताको शव अन्त्यष्टि

नमस्ते खोटाङ संवाददाता–
खोटाङ, बैशाख २८–रक क्लाइम्बिङ गर्ने क्रममा खसेर बैशाख २७ गते निधन भएका कांग्रेस खोटाङका युवा नेता सुचन राईको शव अन्त्यष्टि गरिएको छ । दिक्तेल रूपाकोट मझुवागढी नगरपालिकासंग दुई बुँदे समझदारीपछि पोष्टमार्टम गरी किरात संस्कार अनुसार बैशाख २८ गते अन्त्यष्टि गरिएको हो ।

दिक्तेल रूपाकोट मझुवागढी नगरपालिकाको असावधानीले राईको मृत्यु भएको भन्दै आफन्तले असन्तुष्टी पोखेपछि नगरपालिका र आफन्तबीच बैशाख २८ गते विहान छलफल गरी शव जिम्मा लिनेसहमती भएको थियो । मृतक राईको नाममा दश लाख रूपैयाँको अक्षयकोष स्थापना गर्ने र रक क्लाइम्बिङ गर्ने ठाउँमा पार्क सहित मृतक राईको पूणकदको सालिक राख्ने सहमती भएको हो ।

सहमतीपत्रमा नगरप्रमुख तीर्थराज भट्टराई, उपप्रमुख विसन राई, प्रमुख प्रशासकीय अधिकृत दिनेश राई तथा आफन्तको तर्फबाट मृतका काका हरिनारायण राई, किरात सेवा समाजका गजेन्द्र राई र किसन राईको महस्ताक्षर छ । मृतक राई कांग्रेस खोटाङ (क) का सदस्य तथा तरुण दल खोटाङका सदस्य थिए । उनको शव पोष्टमार्टमपछि कांग्रेस कार्यालयमा राखेर शोकसभा गरी जन्मथलो दिप्रुङ चुइचुम्मा गाउँपालिका–७ टेम्मामा संस्कार अनुसार अन्त्यष्टि गरिएको छ ।