खोटाङको दिप्रुङ चुइचुम्मामा विद्युत सर्ट भएर घर जल्यो

नमस्ते खोटाङ संवाददाता–
खोटाङ, बैशाख १०–विद्युत सर्ट भएर दिप्रुङ चुइचुम्मा गाउँपालिका–५ सप्तेश्वरछितापोखरी खुतुर्केस्थित शम्शेरबहादुर खड्काको घर जलेर नष्ट भएको छ । बैशाख ९ गते राती ११ बजे विद्युत सर्ट भएर आगलागी हुदा ढुङ्गा–माटोको गारो र जस्तापाताले छाएको घर पूर्ण रूपमा नष्ट हुदा करिब २५ लाख बराबरको क्षति भएको हो ।
प्रहरी नायव उपरीक्षक पुरुषोत्तम खड्काका अनुसार घर, लत्ताकपडा, मालसामान, अन्नपात भाडाकुँडा लगायत जल्दा २५ लाख रूपैयाँ बराबरको क्षति भएको हो । याम्खास्थित प्रहरी चौकीबाट खटिएको प्रहरी, स्थानीयले बैशाख १० गते विहान ६ बजेतिर आगो पूर्ण रूपमा नियन्त्रण गरिएको डिएसपी खड्काले सुनाए ।