डढेलोबाट सल्किएको आगोले गोठ जल्दा छ वटा गाई मरे, चार वटा घाइते

नमस्ते खोटाङ संवाददाता–
खोटाङ, बैशाख ९–हलेसी तुवाचुङ नगरपालिका–११ राजापानीमा डढेलोबाट सल्किएको आगोले गोठ जल्दा ६ वटा गाई जलेर मरेका छन् । बैशाख ९ गते दिउसो राजापानीको महंकला सामुदायिक वनमा लागेको डढेलोले मनदत्तास्थित अम्बिका कार्कीको गोठ जल्दा ६ वटा गाई मरेका हुन् ।
अन्य ४ वटा गाई डढेर घाइते छन् । आगोले जस्ता पाताले छाएको एउटा भान्छा घर समेत जलेको छ । भान्छा घर, गोठ, भाँडाकुँडा, चौपाया लगायत जल्दा करिब पाँच लाख बराबरको क्षति भएको खोटाङका प्रहरी नायव उपरीक्षक पुरुषोत्तम खड्काले बताए । राजापानी प्रहरी चौकीका प्रहरी सहायक निरीक्षक गयाप्रसाद चौधरीको कमाण्डमा खटिएको प्रहरी र स्थानीयले आगो नियन्त्रणमा लिएको डिएस्पी खड्काले बताए ।