मलामी गएर फर्कने क्रममा ट्याक्टरले किचेर मृत्यु

नमस्ते खोटाङ संवाददाता–
खोटाङ, चैत ८–मलामी गएर फर्कदै गरेका ऐसेलुखर्क गाउँपालिका–६ ज्यामिरेका ५१ वर्षीय रणबहादुर पोखरेलको मृत्यु भएको छ । दूधकोसीबाट बालुवा लिएर ऐसेलुखर्कबजार जादै गरेको न ४ त ७८०६ नम्बरको ट्याक्टरमा चढेका पोखरेललाई ओर्लने क्रममा चैत ७ गते साँझ त्यही ट्याक्टरले किचेको हो ।
घर नजिकै आएपछि ओर्लन खोज्दा ट्याक्टरले किचेको र प्राथमिक स्वास्थ्य केन्द्र ऐसेलुखर्कमा उपचारको क्रममा चैत ७ गते साँझ मृत्यु भएको जिल्ला प्रहरी कार्यालय खोटाङका प्रवक्ता प्रहरी निरीक्षक बेनु कार्कीले बताए । पोखरेलको शव प्राथमिक स्वास्थ्य केन्द्र ऐसेलुखर्कमै पोष्टमार्टम गर्ने तयारी गरिएको कार्कीले सुनाए ।
सोलुखुम्बु थुलुङ दूधकोसी गाउँपालिका–९ का चालक २० वर्षीय ओमराज तामाङ, रावाबेसी गाउँपालिका–१ कुभिण्डेका २० वर्षीय प्रकाश बिसङ्खे र ऐसेलुखर्क गाउँपालिका–६ ज्यामिरेका १६ वर्षीय पेशल राईलाई प्रहरीले नियन्त्रणमा लिएको कार्कीले जनाए । उनीहरूलाई अनुसन्धान गरी दोषीलाई कारबाही प्रक्रिया बढाइने समेत कार्कीले बताए ।