यूएइ पठाएर अलपत्र पार्ने मेनपावर कम्पनीलाई सात दिनभित्र लिखित जवाफसहित उपस्थित हुन वैदेशिक रोजगार विभागको निर्देशन

नमस्ते खोटाङ संवाददाता–
खोटाङ, चैत ६–यूएइ पठाएर अलपत्र पार्ने मेनपावर कम्पनीलाई वैदेशिक रोजगार विभागले सात दिनभित्र लिखित जवाफ सहित उपस्थित हुन चैत ६ गते पत्र काटेको छ । जन्तेढुङ्गा गाउँपालिका–५ चिसापानीका परशुराम राई र राजकुमार राईको उद्धारका लागि जिल्ला प्रशासन कार्यालयमा निवेदन दिएको र प्रशासनले वैदेशिक रोजगार विभागलाई पत्राचार गरेपछि उक्त विभागले काठमाडौंस्थित मेची इन्टरनेशनल ओभरसिज प्रालिलाई लिखित जवाफ सहित उपस्थित हुन पत्र काटेको हो ।
उक्त मेनपावर कम्पनी मार्फत माघ २७ गते परशुराम र फागुन ११ गते यूएइ पुगेका राजकुमारले कामदार करारनामा अनुसार काम र तलव सेवा सुविधा नपाएको र एक सातादेखि भोकै बस्नु परेको भन्दै उनीहरूलाई उद्धार गर्न माग गर्दै निवेदन परेको खोटाङका प्रमुख जिल्ला अधिकारी प्रवित्रप्रकाश साहले बताए । उनीहरूले उक्त मेनपावर कम्पनीलाई एक लाख दश हजार रूपैयाँ तिरेर यूएइ पुगेको आफन्तले बताएका छन् ।
उनीहरूलाई मेनपावर कम्पनीले क्लिनरको काम लगाउने भन्दै फरक–फरक मितिमा युनिक स्टार जेनेरल सेक्युरिटी गार्ड सर्भिस र नूर अल अफसा जेनेरल क्लिनिक सर्भिस कम्पनीमा लगिएको थियो । तर संझौताअनुसार कम्पनीमा नलगी सप्लाइमा फरक–फरक काम लगाउने, नियमित काम नदिने, काम गरेको पैसा पनि नदिएको भन्दै आफन्तले प्रशासनमा उद्धारको माग गरेका थिए ।
कामदार करारनामा अनुसार काम र पारिश्रमिक नपाउदा खोटाङका दुई जना सहित सुर्खेतका भविष्य जिमी, पाल्पा तिनाउका देवसिं सुनारी, उदयपुरका किशोर खत्री र मानबहादुर कार्की, गुल्मी मुसिकोटका हिमाल सरतुङ्गे, कालिकोटका जितेन्द्र शाही, नवलपरासीका सुनिल श्रेष्ठ, मोरङ्का करण सरदार र पदम नेपाल, तेह«थुमका लक्ष्मीप्रसाद दुलाल, दैलेखका मानबहादुर शाही, झापाका मिश्रीलाल दास, धादिङका तिलकबहादुर सुनार, सिन्धुपाल्चौकका खड्कबहादुर श्रेष्ठ, गोरखाका आशबहादुर गुरुङ, नुवाकोटका लाक्पा तामाङ र कपिलवस्तुका मनोज थारु ऋलपत्र परेका छन् ।