खोटेहाङ बोम्लुङको महेन्द्रोदय माविले ६१ औं वार्षिक उत्सव मनायो, उत्सवको अवसरमा आयोजित भलिबल प्रतियोगिताको बिजेतालाई खसी

नमस्ते खोटाङ संवाददाता–
खोटाङ, फागुन ११–खोटेहाङ गाउँपालिका–२ वाप्लुखाको बोम्लुङस्थित महेन्द्रोदय माविको ६१ औं वार्षिक उत्सवको अवसरमा आयोजित साविक अन्तरवडास्तरीय भलिबल प्रतियोगिताको उपाधि स्वरूप साबिक वडा नं ८ मुखिताङले खसी हात पारेको छ । फागुन ११ गते सम्पन्न खेलमा साबिक वडा नं २ कपासेलाई हराउँदै दश हजार मुल्य बराबरको खसी सहित प्रमाणपत्र हात पारेको हो ।
उपविजेता कपासेले चार हजार बराबरको पाठी र तेश्रो हुने साबिक वडा नं १ बोम्लुङले तीन हजार बराबरको भाले जितेको छ । त्यस्तै अन्तर प्रावि स्तरीय हाजिरी जवाफ प्रतियोगितामा महकन्या आधारभूत विद्यालय प्रथम, महेन्द्रोय मावि दोश्रो र संस्था समाजकाली आधारभूत विद्यालय तेश्रो भएको छ । प्रथम, दोश्रो र तेश्रो हुनेले नगद १५ सय, हजार र आठ सय हात सहित प्रमाणपत्र पाएका छन् ।
अन्तर आमा समूह स्तरीय नृत्य प्रतियोगितामा सचेतना आमा समूह बोम्लुङ प्रथम, दीपज्योति आमा समूह कपासे दोश्रो र सयपत्री आमा समूह सुम्लिखा तेश्रो भएको छ । प्रथम, दोश्रो र तेश्रो हुने समूहले दुई हजार, एक हजार पाँच सय र एक हजार नगद सहित प्रमाणपत्र पाएका छन् । शिक्षकहरुको हट पोटेटो (तातो आलु) प्रतियोगितामा सावाकाली माविका शिक्षक भानुभक्त सापकोटा पुरस्कार जितेको विद्यालय व्यवस्थापन समितिका अध्यक्ष दिपेन थुलुङले बताए । कार्यक्रमका प्रमुख अतिथि गाउँपालिका उपाध्यक्ष रुपेश राईले पुरस्कार वितरण गरेका थिए ।
वार्षिक उत्सवको अवसरमा विभिन्न ११ वटा अक्षयकोषबाट विभिन्न विधामा ३६ जना विद्यार्थीलाई पुरस्कृत गरिएको छ । वार्षिक उत्सवकै अवसरमा गाउँपालिका अध्यक्ष उदीमबहादुर राईले बुवा–आमाको नामबाट ५० हजार बराबरको ‘धन्जुमान–लगनशोभा स्मृति अक्षयकोष’ स्थापना गरेका छन् । उक्त विद्यालयमा एसइइलाई लक्षित गरेर १२ जना विद्यार्थीलाई होस्टेलको समेत व्यवस्था गरिएको विद्यालय व्यवस्थापन समितिका अध्यक्ष थुलुङले बताए ।