किसानलाई किवीको विरुवा बाँड्दै नगरपालिका

नमस्ते खोटाङ संवाददाता–
खोटाङ, फागुन ९–दिक्तेल रुपाकोट मझुवागढी नगरपालिकाले किसानलाई किवीको विरुवा वितरण सुरु गरेको छ । कृषिको माध्यमबाट समृद्धिको मेसो समात्न किवीको विरुवा वितरण सुरु गरेको हो ।
दिक्तेल रुपाकोट मझुवागढी नगरपालिकाका उपप्रमुख विसन राईका अनुसार नगरको माथिल्लो क्षेत्रमा व्यवसायिक किवी खेती गर्ने किसानलाई विरुवा वितरण सुरु गरिएको हो । उत्पादनमा उपमेयर कार्यक्रम अन्तरगत यो वर्षको पहिलो चरणमा १३ हजार किवीको वितरण गरिने राईले बताए । ‘१६ सय मिटरदेखि माथिका क्षेत्रमा किवी पकेट क्षेत्र बनाएर किसानको आर्थिक समृद्धिका लागि किवी वितरण सुरु गरिएको हो ।’ उनले भने–‘आगामी दुई वर्षभित्र एक लाख विरुवा वितरण गरिने छ र यसबाट एक करोड एक करोड किवी उत्पादन गर्ने लक्ष्य छ ।’
किसानले उत्पादन गरेको किवी नगरपालिकाले बजारीकरण गरिदिने लक्ष्य लिइएको राईको भनाई छ । गाउँमै रोजगार सिर्जना गरेर युवालाई विदेश पलायन र बसाइ सराइलाई रोक्ने योजना बनाइएको राईले धारणा राखे ।