प्रजिअ लगायतका कर्मचारी व्यवस्था गर्न गृहमन्त्रीको ध्यानाकर्षण

नमस्ते खोटाङ संवाददाता–
खोटाङ, फागुन ६–जिल्लास्थित जनप्रतिनिधिहरुले गृहमन्त्री नारायणकाजी श्रेष्ठलाई जिल्लाका समस्याको विषयमा ध्यानाकर्षण गरएका छन् । रिक्त कर्मचारी, बैदेशिक रोजागरीमा जान चाहनेहरुमाथिको ठगी लगायतका समग्र जिल्लाको समस्याको बारेमा ध्यानाकर्षण गराएका हुन् ।
खोटाङका प्रमुख जिल्ला अधिकारी, इलाका प्रशासन कार्यालय खोटाङ बजार र ऐसेलुखर्कको प्रमुखहरूको व्यवस्था गर्न माग गरिएको प्रतिनिधिसभा सदस्य रामकुमार राईले बताए । ‘जिल्ला प्रशासन कार्यालयमा सहसचिवको दरबन्दी रहे पनि सहायक प्रजिअले काम चलाई रहेको र दुवै इलाका प्रशासन कार्यालयमा समेत नायव सुब्बाले काम गरिरहेकाले दरबन्दी अनुसारको कर्मचारी व्यवस्था गर्न गृहमन्त्रीको ध्यानाकर्षण गराइएको छ ।’–राईले भने–‘बैदेशिक रोजगारीमा जान चाहनेहरु पनि ठगिएको गुनासो आएकाले यसबारेमा पनि जानकारी गराइएको छ ।’
ध्यानाकर्षणका लागि राई लगायत संविधानसभा सदस्य दुर्गाजयन्ती राई लगायत निर्वाचित जनप्रतिनिधिहरु, नेताहरु लगायतको सहभागिता थियो ।