ऐसेलुखर्कको जलेश्वरीमा निर्माणाधीन खानेपानी ट्याङ्कीमा अज्ञातद्वारा आगो लगाइयो

प्रकाशित मितिः फागुन 2, 2080
658 पटक पढिएको
संवादताता

नमस्ते खोटाङ संवाददाता–
खोटाङ, फागुन २–ऐसेलुखर्क गाउँपालिका–४ जलेश्वरीमा निर्माणाधीन खानेपानी योजनाको रिजर्भ ट्याङ्कीमा अज्ञातद्वारा आगो लगाइएको छ । स्थानीय झाप्री तीनटाट्ने खानेपानी योजनाको निर्माणाधीन ट्याङ्की जलाइएको हो ।
गाउँपालिका अध्यक्ष गिरेन्द्रबहादुर राईका अनुसार माघ २९ गते राती अज्ञात व्यक्तिद्वारा जलाइएको हो । दश हजार घनमिटरको ट्याङ्की निर्माणका लागि ठड्याएर भित्रपट्टी बनाइएको पाइपको फर्मा समेत नष्ट भएको छ । आगजनी गर्नेको पहिचान नभएको र संलग्नको खोजी भइरहेको ऐसेलुखर्क गाउँपालिका–४ जलेश्वरीका वडाअध्यक्ष भक्त तामाङले बताए ।
आर्थिक वर्ष २०८०÷८१ मा वडाको नौ लाख ९५ हजार रूपैयाँको लागतमा उक्त योजना सञ्चालन भएको हो । यो योजना अन्तरगत पाइपलाइन, दुई वटा रिजर्भ ट्याङ्की, दुई वटा इन्टेक मध्ये १२ हजार घनमिटरको रिजर्भ ट्याङ्की र एउटा इन्टेक निर्माण भइसकेको छ । दश हजार घनलिटरको एउटा रिजर्भ ट्याङ्की र एउटा इन्टेक बन्न बाँकी रहेको वडाअध्यक्ष तामाङले बताए ।

प्रतिक्रिया दिनुहोस