उधौलीको अवसरमा राज्यले दिएको बिदाको दिन बराहापोखरी गाउँपालिकामा विद्यालय सञ्चालन गरेको भन्दै यायोक्खाले ज्ञापन बुझायो

नमस्ते खोटाङ संवाददाता–
खोटाङ, पुस ११–किराती समुदायको उधौलीको अवसरमा राज्यले दिएको सार्वजनिक बिदाको दिन बराहापोखरी गाउँपालिकामा विद्यालय सञ्चालन गरेको भन्दै किरात राई यायोक्खा खोटाङले जिल्ला प्रशासन कार्यालय र जिल्ला शिक्षा समन्वय इकाइमा ज्ञापन पत्र बुझाएको छ । पुस १० गते किराती समुदायको उधौलीको अवसरमा राज्यले दिएको बिदामा विद्यालय सञ्चालन गरेको भन्दै पुस ११ गते सहायक प्रमुख जिल्ला अधिकारी पवित्रप्रकाश साह र जिल्ला शिक्षा समन्वय इकाइका निमित्त प्रमुख नन्दबहादुर वि.क.लाई ज्ञापन पत्र बुझाएका हुन् ।

किराती समुदायको अस्तित्वलाई नामेट गर्ने गरी राज्यले दिएको सार्वजनिक बिदामा विद्यालय सञ्चालन गरिएकाले कानुन अनुसारको कारबाही गर्नु पर्ने किरात राई यायोक्खा खोटाङका अध्यक्ष युगसन किरातले बताए । गाउँपालिका अध्यक्ष सालिग्राम बन्जराले भने उक्त गाउँपालिकाका शिक्षक महासंघ, प्रअहरुले निर्णय गरेरै विद्यालय सञ्चालन गरेको बताए । शिक्षक महासंघका अध्यक्ष विश्वमणि आचार्यले गत असोज ४ र ५ गते काठमाडौंमा भएको शिक्षकहरुको आन्दोलनमा सहभागी हुन विद्यालय बन्द गरिएको र त्यसको सट्टामा पुस ९ गते इद र पुस १० गते उधौलीमा विद्यालय सञ्चालन गरिएको बताए । उक्त पालिकामा ६ मावि र २८ आधारभूत विद्यालय छन् ।