पक्राउ परेकाहरुलाई छाड्नु पर्ने माग राख्दै पहिचानपक्षधरहरुको प्रदर्शन

सविना अछामे–
खोटाङ, मङ्सिर २९–पक्राउ परेका पूर्व संस्कृति मन्त्री गोपाल किराती लगायतकालाई छाडनु पर्ने माग राख्दै पहिचानपक्षधरहरुले मङ्सिर २९ गते दिक्तेल बजारमा प्रदर्शन गरेका छन् । नेकपा एमालेका अध्यक्ष केपी ओलीको ‘झुलाघाट–चिवाभन्ज्याङ समृद्धिका लागि संकल्प यात्रा’लाई अवरोध पु¥याएको आरोपमा मङ्सिर २६ गते पक्राउ परेका पूर्व संस्कृति मन्त्री किराती लगायत अन्य पाँच जनालाई विना सर्त रिहाईको माग गर्दै प्रदर्शन गरेका हुन् ।
पूर्व संस्कृति मन्त्री किराती, जनता समाजवादी पार्टी खोटाङका जिल्ला सदस्य राजेश राई, वाइसीयल नगर इन्चार्ज विजय राई, जनता समाजवादी पार्टीका जिल्ला सदस्य गन्धमान राई र नुनथलाबाट नेपाल आदिवासी जनजाति महासंघ खोटाङका महासचिव उदीम चाम्लिङलाई विना सर्त रिहाईको माग गरेका हुन् ।
किरात चौकबाट जुलुस त्रिवेणीचौक हुँदै प्रशासनिक क्षेत्रमा पुगेर कोणसभामा परिणत भएको थियो । कोणसभामा पहिचानवादीहरु रविन खम्बु, किसन भुजेल, किरण रुम्दाली, मोतिचन्द्र राई, उपार्जुन चाम्लिङ लगायतले पहिचानको आधारमा नामाङ्कन हुनु पर्ने धारणा राख्दै पक्राउ परेकाहरुलाई विना सर्त छाड्न माग गरेका हुन् ।
पहिचानपक्षधरहरुले प्रमुख जिल्ला अधिकारी सन्तबहादुर सुनारलाई ज्ञापन पत्र समेत बुझाएका छन् । पहिचानको आन्दोलनमा उत्रिएका पूर्व संस्कृति मन्त्री किराती लगायत अन्य पाँच जनालाई झुटो मुद्दा लगाएर हिरासतमा राखिएको भन्दै तत्काल विना सर्त रिहाई गर्नु पर्ने विज्ञप्तीमा उल्लेख छ ।