एमाले अध्यक्ष ओलीमाथि आक्रमणको प्रयास, घटनामा संलग्न एक पक्राउ

नमस्ते खोटाङ संवाददाता–
धनकुटा, मङ्सिर २८–नेकपा एमालेका अध्यक्ष केपी ओलीलाई आक्रमण प्रयास गरेको अभियोगमा धनकुटा महालक्ष्मी–५ का महेश राई पक्राउ परेका छन् । प्रहरीले रोक्न खोज्दाखोज्दै भीडमा पसेर ओलीमाथि आक्रमण गर्न खोजेकाले उनलाई पक्राउ गरिएको प्रहरीले जनाएको छ ।
उनले फूलमाया लगाउँने लाइनमा जान खोजेको तर एमाले कार्यकर्ताकै सहयोगमा स्वागत गर्ने लाइनमा पुगेर टाउकोमा मुक्का हान्ने प्रयास गरेको प्रहरीले जनाएको छ । ओली झुलाघाट–चिवाभन्ज्याङ समृद्धिका लागि संकल्प यात्राको क्रममा भोजपुरबाट धनकुटा प्रवेश गरेपछि फूलमाला र अविरले स्वागत गर्ने लाइनमा बसेर राईले आक्रमण प्रयास गरेको प्रहरीको भनाई छ । आक्रमण लगत्तै एमाले कार्यकर्ताले उनलाई कुटपिट गरेका थिए । उनलाई प्रहरीले नियन्त्रणमा लिएर थप अनुसन्धान गरिरहेको छ ।