फर्जी बिलको भुक्तानी गर्न दबाब दिएको भन्दै गाउँपालिका छाड्ने प्रमुख प्रशासकीय अधिकृतको सरुवा

नमस्ते खोटाङ संवाददाता–
खोटाङ, कात्तिक २–फर्जी बिलको भुक्तानी गर्न दबाब आएको भन्दै गाउँपालिका छाडेर हिड्ने दिप्रुङ चुइचुुम्मा गाउँपालिकाका प्रमुख प्रशासकीय अधिकृत सरोज रेग्मीको सरुवा भएको छ । गाउँपालिका अध्यक्ष लोकेन्द्र राईले प्रक्रिया नपुगेका बिलहरुको भुक्तानी गर्न दबाब दिएपछि असोज २९ गते गाउँपालिका छाडेर हिडेका उनको सोलुखुम्बुको नेचासल्यान गाउँपालिकामा सरुवा भएको हो ।
प्रक्रिया नपुगेको बिलहरुको भुक्तानी गर्न दबाब दिएपछि गाउँपालिका छाडेर गएको प्रमुख जिल्ला अधिकारी सन्तकुमार सुनारले बताए । गाउँपालिका अध्यक्ष लोकेन्द्र राईले भने त्यस्तो कुनै प्रेसर नदिएको दाबी गरे । रेग्मी असोज २८ गते कार्यालय बसेर असोज २९ गते विहान तीनै बजे गाउँपालिका छाडेका थिए । असोज २९ गते विहान गाउँपालिकाको मोटरसाइकलमा दिक्तेलसम्म आएर गाडी चढेर विराटनगर गएका हुन् । उनले चढेको मोटरसाइकल दिक्तेलस्थित कोस तथा लेखा नियन्त्रकको कार्यालयमा छाडेर गएका थिए ।
प्रमुख प्रशासकीयले गाउँपालिका छाडेर गएपछि कात्तिक १ गतेसम्म गाउँपालिकामा हाजिर हुन गाउँपालिका अध्यक्षले सामाजिक सञ्जाल फेसबुक मार्फत निर्देशन दिएका थिए । गाउँपालिकामा हाजिर नभएपछि उनलाई सरुवा गरिएको गाउँपालिका अध्यक्ष राईले बताए । दिप्रुङ चुइचुम्मा गाउँपालिकामा अधिकृत छैटौ पिएसपी चाम्लिङलाई निमित्तको जिम्मेवारी दिएको अध्यक्ष राईले बताए ।